2016-இல் படிக்கப் போகும் புத்தகங்கள்

பட்டியல் சின்னதாக இருந்தால் போதும், ஆனால் இந்த வருஷமாவது முடித்துவிட வேண்டும்.

  1. War and Peace
  2. Crime and Punishment
  3. Bridge on Drina
  4. Woman in the Dunes
  5. கொற்றவை
  6. காவல் கோட்டம்
  7. அஞ்ஞாடி
  8. புயலிலே ஒரு தோணி
  9. கடலுக்கு அப்பால்
  10. ஆரோக்ய நிகேதன்

உங்கள் பட்டியல் என்ன? எந்தப் புதிய புத்தகங்களைப் படிக்க வேண்டும் என்று நினைத்திருக்கிறீர்கள்? ரொம்ப நாளாக படிக்க வேண்டும் என்று நினைத்து தள்ளிப் போய்க் கொண்டே இருக்கும் புத்தகங்கள் உண்டா? (என் பட்டியல் முழுவதுமே அப்படி தள்ளிப் போய்க் கொண்டிருக்கும் புத்தகங்கள்தான்.) இங்கே பகிர்ந்து கொள்ளுங்களேன்!

தொகுக்கப்பட்ட பக்கம்: புத்தகப் பரிந்துரைகள்

சுஜாதாவின் திரைப்பட அனுபவம் – காயத்ரி

குமுதத்தில்சுஜாதாவின் கதை” என்ற தொடரிலிருந்து:

gayatri_filmசுஜாதாவின் நாவல்களில் முதலில் படமாகியது காயத்ரி. பஞ்சு அருணாசலம்தான் அந்தப் படத்தைத் தயாரித்தார்.

தினமணி கதிரில் ‘காயத்ரி’ தொடராய் வரும்போதே அதை திரைப்படமா எடுக்கணும்னு நினைச்சேன். தொடர் முடிஞ்சதும் சுஜாதாவை பாம்குரோவ் ஓட்டல் ரூம்ல சந்திச்சேன். ரொம்ப எளிமையா பழகுனார். பெரிய எழுத்தாளர்களுக்கு இருக்கும் பந்தா எதுவும் இல்ல. எல்லாத்தையும் ரொம்ப ஆர்வமா கேட்டுட்டார். அப்போ அவருக்கு சினிமா ரொம்பப் புதுசு. அவரோட ஆர்வம் என்னை ரொம்ப கவர்ந்தது

என்று தான் முதலில் சுஜாதாவைச் சந்தித்தது பற்றிச் சொல்கிறார் பஞ்சு அருணாசலம்.

படம் வெளில வந்த பிறகு அந்தப் படத்தில் அவருக்கு அத்தனை திருப்தியில்லை. சினிமா திரைக்கதைக்காக சிலவற்றை மாற்றியிருந்தோம். அதைச் சொன்னதும் புரிஞ்சுக்கிட்டார். கதையாய் எழுதுவது வேறு. அதை சினிமாவுக்காக மாற்றுவது வேறு என்பதை உணர்ந்து கொண்டார்

என்கிறார் பஞ்சு அருணாசலம்.

சுஜாதாவும் ‘காயத்ரி’ கதைக்கு சினிமாவில் நடந்த சேதாரங்களைப் பற்றி பல இடங்களில் குறிப்பிட்டிருக்கிறார். ஆனால் அந்த முதல் பட அனுபவத்திலேயே சினிமாவின் சூட்சுமங்கள் அவருக்கு பிடிபட்டுவிட்டது.

எழுதப்பட்ட கதை சினிமாவாக மாறும்போது எப்படியெல்லாம் வேஷம் மாறும் என்பதை எனக்கு முதலில் உணர்த்திய அனுபவம் அது. ஒரு வகையில் ‘ப்ரியா‘ போன்ற பெரிய அதிர்ச்சிகளுக்கு என்னை தயார்படுத்தியது

என்று குமுதத்தில் எழுதிய கட்டுரை ஒன்றில் குறிப்பிடுகிறார் சுஜாதா.

தொகுக்கப்பட்ட பக்கம்: சுஜாதா பக்கம், திரைப்படங்கள்

தொடர்புடைய சுட்டிகள்:
காயத்ரி நாவல் பற்றி
காயத்ரி திரைப்பட விமர்சனம்
காயத்ரி பற்றி உப்பிலி ஸ்ரீனிவாசின் தொகுப்பு

சுஜாதாவின் சில பல புத்தகங்கள்

sujathaசுஜாதாவின் பெரிய பலம் அனாவசிய வார்த்தைகள், உபதேசங்கள், புலம்பல் இல்லாமல் எழுதுவது, கச்சிதமாக எழுதுவது, நல்ல நடை, பாத்திரங்களின் நம்பகத்தன்மை. பல குறுநாவல்களில் இது தெரிகிறது. ஆனால் பல குறுநாவல்களில் அன்றைய “யூத்துக்காக” எழுதி இருப்பது, deadline அழுத்தம் எல்லாமும் தெரிகிறது. சிறு வயதில் என் மீது சுஜாதாவுக்கு இருந்த தாக்கத்தால் நான் இன்னும் இந்தக் குறுநாவல்களைப் படிக்கலாம், ஆனால் இவற்றில் வெகு சிலவே படிக்க வேண்டியவை. ஆனால் அனேகமாக எதுவுமே போரடிக்காது.

இவற்றில் நான் பரிந்துரைப்பது 6961 (சூழலில் பொருந்தாத மனைவி பாத்திரத்துக்காக), ஆதலினால் காதல் செய்வீர் (தமிழாசிரியை பாத்திரத்துக்காக), ஜேகே, நில் கவனி தாக்கு மற்றும் பதினாலு நாட்கள் (விறுவிறுப்புக்காக), ரோஜா (எழுபதுகளின் வேலை நிறுத்த சூழலின் தத்ரூப சித்தரிப்புக்காக), மூன்று நாள் சொர்க்கம் மற்றும் தேடாதே (கச்சிதமான வடிவத்துக்காக). பரிந்துரைப்பது என்றால் படித்தே ஆக வேண்டும் என்பதில்லை. ஏதோ ஒரு விஷயமாவது என்னைக் கவர்ந்தது, அவ்வளவுதான்.

நான் படித்தவற்றுக்கான ட்விட்டர் ஸ்டைல் குறிப்புகள் கீழே.

பரிந்துரைப்பவை:

மூன்று நாள் சொர்க்கம்: ஒன்றே ஒன்று படிக்க வேண்டுமென்றால் இதைத்தான் சொல்வேன். ஓடிப் போகும் ஜோடி; ஆண் தன் இரு நண்பர்களையும் சேர்த்துக்கொண்டு ஓடிப் போகிறான். காதல் மாறுகிறது. நன்றாக எழுதப்பட்டிருக்கிறது.

6961: பணக்கார மனைவி கார் ட்ரைவரிடம் சினேகிதம் காட்டுவது ட்ரைவரின் கொலையில் முடிகிறது. மனைவி தன் சூழலில் பொருந்தாதது நன்றாக வந்திருக்கும்.

ஆதலினால் காதல் செய்வீர் அவர் மிகவும் பாப்புலராக இருந்த காலத்தில் எழுதப்பட்டது. சிம்பிளாக முடிச்சு போட்டு சிம்பிளாக அவிழ்த்திருக்கிறார். மனிதருக்கு நகைச்சுவை உணர்ச்சி அபாரம். அந்த தமிழாசிரியை பாத்திரம் பிரமாதம். நினைவிருக்கப் போவது அந்தப் பாத்திரம்தான்.

ஜேகே: அவரது ஆரம்ப கால முயற்சிகளில் ஒன்று. அன்றைய யூத்துக்காக நிறையவே மெனக்கெட்டிருக்கிறார், ஆனால் சில இடங்கள் இன்று செயற்கையாகத் தெரிகின்றன. இறுதியில் நல்ல ட்விஸ்ட்.

நில் கவனி தாக்கு: சுஜாதாவின் ஆரம்ப கால முயற்சிகளில் ஒன்று. அப்போதெல்லாம் ஜேம்ஸ் ஹாட்லி சேஸ்தான் சுஜாதாவின் ஆதர்சமாக இருந்திருக்க வேண்டும். விறுவிறுவென்று போகும் கதை. அந்தக் காலகட்டத்தின் யூத்துக்கு அப்பீல் ஆக வேண்டும் என்று முனைந்திருக்கிறார். கடைசி ட்விஸ்ட் இந்தக் கதையை நினைவு கொள்ள வைக்கிறது.

பதினாலு நாட்கள்: பங்களாதேஷ் விடுதலைப் போரை பின்புலமாக வைத்து எழுதப்பட்ட ஒரு சிம்பிள் கதை. அன்றைக்கு பெரிதும் விரும்பிப் படிக்கப்பட்டிருக்கும். ஒரு பைலட் பாகிஸ்தானி விமானங்களுடன் சண்டை போடும்போது சுடப்பட்டு பாகிஸ்தானிய ராணுவத்திடம் பிடிபடுகிறான். அங்கே ஒரு வெறி பிடித்த காப்டனிடம் சித்திரவதைப்படுகிறான். முன்னேறி வரும் இந்தியர் ராணுவம் அவனை மீட்கிறது. இன்றைக்கும் படிக்கலாம்.

ரோஜா: தொழிற்சங்கம், கயமைத்தனம் உள்ள தலைவன், அவன் கற்பழித்துக் கொல்லும் பெண், மோப்பம் பிடிக்கும் இன்ஸ்பெக்டர்; வேலை நிறுத்தத்தில் இன்ஸ்பெக்டர், தலைவன் இருவரும் இறப்பதோடு முடிகிறது.

தேடாதே: கச்சிதமான திரில்லர்; ஒரு புகைப்படக்காரனும், ஒரு தொழிலதிபரின் சின்ன வீடும் மணம் செய்து கொள்ள தீர்மானிக்கிறார்கள். தொழிலதிபருக்கு ஈகோ பிரச்சினை, சின்ன வீட்டை கொலை செய்துவிடுகிறார். துப்பறிவதுதான் கதை.

மற்றவை:

அப்சரா: கொஞ்சம் மனநிலை சரியில்லாத சீரியல் கில்லர்.

ஆஸ்டின் இல்லம்: பணக்கார கூட்டுக் குடும்பம். செல்லப் பேரனுக்கு muscular dystrophy. பிழைக்க வழி இல்லை. மிஞ்சிப் போனால் நாலைந்து வருஷம்தான். இதில் குடும்பத் தகராறு, பணம் வந்த விதம் என்றெல்லாம் பேசுகிறார்கள். சுஜாதாவுக்கு muscular dystrophy பற்றி சொல்ல வேண்டும் என்று ஆசை, அதனால் ஒரு சின்ன குறுநாவல் எழுதி இருக்கிறார். அவ்வளவுதான்.

இளமையில் கொல்: இன்ஸ்பெக்டர், அண்ணன், அண்ணி தரும் அழுத்தத்தால் ஒருவன் தன் நண்பனுக்கெதிராக பொய் சாட்சி சொல்கிறான். ஆனால் கேசில் நண்பன் விடுதலை அடைந்துவிடுகிறான். இவனை பழி வாங்க அலைகிறான். இவன் ஒரு கொலைக் கேசில் மாட்டிக் கொள்ள நண்பனுக்கு அடித்தது சான்ஸ்! அவன் பொய் சாட்சி சொல்ல முன் வருகிறான். ஒரு ஓ. ஹென்றி ட்விஸ்ட் கொடுத்து சுஜாதா தன் திறமையை காட்டுகிறார்.

இன்னும் ஒரு பெண் மனம்: இன்னொரு பெண் மேல் ஆசைப்படும் 45 வயது தொழிலதிபர். மனைவியைக் கொல்லப் போடும் திட்டம் ஓ. ஹென்றி ட்விஸ்ட்டாக தன் மேலேயே வந்து விடிகிறது.

இப்படி ஒரு மாறுதல்: வயதான எம்.டி. செகரடரியைப் பார்த்து ஜொள்ளு. செகரட்டரி எப்படி சமாளிக்கிறாள்? வேஸ்ட்.

ஜோதி: இதுவும் அவரது ஆரம்ப கால முயற்சி. குற்றவாளி யாரென்று தெரிந்தும் கைது செய்ய முடியாத சூழ்நிலை. சுஜாதாவே ஒரு பாத்திரமாக வருவது சுவாரசியம்!

கை: கையை படம் படமாக வரையும் ஓவியனுக்கு கை போய்விடுகிறது. சுமாராக இருக்கிறது.

மனைவி கிடைத்தாள்: அழகி சாதாரணமான வாலிபனை விரும்பி மணக்கிறாள். நண்பன் ரூட் விடும் கதை.

ஓரிரவில் ஒரு ரயிலில்: ஒரு பெரிய சாமியாருக்கு கொலை மிரட்டல். வேஸ்ட்.

ஒரு சிக்கலில்லாத காதல் கதை: கொஞ்சம் அழகு குறைவான டாக்டர் தன் தொழிலில் நிறைவு காண்கிறாள்.

சிவந்த கைகள், கலைந்த பொய்கள்: போலி எம்.பி.ஏ. சான்றிதழ் கொடுத்து வேலையில் சேர்ந்து கிடுகிடுவென்று மேலே போகும் ஒரு இளைஞனின் மோசடி தெரிந்துவிடுகிறது. ஏமாற்று வேலை பற்றி தெரிந்த பெரியவரை இளைஞன் “சிவந்த கைகள்” குறுநாவலில் கொன்றுவிடுகிறான். பிறகு என்ன நடக்கிறது என்பது “கலைந்த பொய்கள்” குறுநாவலில்.

தப்பித்தால் தப்பில்லை: சாது கணவன், சோரம் போகும் மனைவி. கணவனுக்கு விஷயம் தெரிகிறது. அவளை கொலை செய்ய கச்சிதமாகத் திட்டமிடுகிறான். பிறகு? இதிலும் ஒரு ஓ. ஹென்றி ட்விஸ்ட்.

விக்ரம்: மசாலா சினிமா கதையில் சுஜாதாவும் ஒன்றும் கிழிப்பதற்கில்லை. இண்டியானா ஜோன்ஸ் படத்திலிருந்து ஒரு காட்சி அப்படியே எடுத்தாளப்பட்டிருக்கிறது. சின்ன சின்ன நகாசு வேலை செய்திருக்கிறார், அவ்வளவுதான்.

விளிம்பு: ஸ்கிட்சோபிரனியா என்ற முடிச்சு எழுதப்பட்ட காலத்தில் புதுமையாக இருந்திருக்கும்.

விருப்பமில்லாத திருப்பங்கள்: மெதுமெதுவாக குற்ற உலகில் இழுக்கப்படும் ஒருவன். சுமார்.

விடிவதற்குள் வா: புது கிருஸ்துவர்களுக்கும் ஹிந்துக்களுக்கும் நடுவில் டென்ஷன் இருக்கும் ஒரு கிராமம். துபாயிலிருந்து திரும்பி வரும் கணவன். மனைவியைக் காணவில்லை. பாதிரியார் மேல் சந்தேகம் என்று சின்னப் பொறி பெரிய கலவரமாக வெடிக்கிறது. கணவனே தடுக்க முயன்றாலும் நடக்கவில்லை. மனைவி உயிரோடுதான் இருக்கிறாள் என்று முடிக்கிறார். சுமார்.

விழுந்த நட்சத்திரம்: சினிமா உலக நண்பன் ஏமாற்றுகிறான்.

இவற்றைத் தவிர வேறு இரண்டு புத்தகங்களைப் பற்றியும் இங்கேயே எழுதிவிடுகிறேன். தனியாகப் பதிவு எழுதும் அளவுக்கு அவை வொர்த் இல்லை.

வேணியின் காதலன்: நடைபாதை உணவுக்கடை வைத்திருக்கும் குடும்பம். குடிகார அப்பன். டீனேஜ் மகள் வேணிதான் நடத்துகிறாள். அவளை சைட்டடிக்கும் சிலர். காதலன், ஒருதலைக் காதலன், திருமணம் செய்துகொள்ள முன்வரும் காதலன் காணாமல் போவது என்று போகிறது.

தூண்டில் கதைகள், மீண்டும் தூண்டில் கதைகள்: தொண்ணூறுகளின் மத்தியில் சுஜாதா வாரப்பத்திரிகையில் சிறுகதை வடிவம் மறைகிறதே என்று கவலைப்பட்டிருக்கிறார். குமுதத்தில் வாரப் பத்திரிகை சிறுகதை ஸ்டைலில் சில சிறுகதைகளை எழுதி இருக்கிறார். ஒரு கணேஷ்-வசந்த் சிறுகதை கூட உண்டு. ஆனால் எதுவுமே அவரது திறமையைக் காட்டவில்லை என்பதுதான் சோகம்.

கடவுள் இருக்கிறாரா அறிவியல் கணிதக் கோட்பாடுகளுக்கு சிறந்த அறிமுகப் புத்தகம். இன்றும் படிக்கலாம். என்ன ஆச்சரியம் தற்செயலைப் பற்றி பேசுகிறது, தவிர்க்கலாம்.

தொகுக்கப்பட்ட பக்கம்: சுஜாதா பக்கம்

சுஜாதாவின் ‘ஒரே ஒரு துரோகம்’

sujathaவாரப் பத்திரிகை தொடர்கதைதான். சாவியில் எண்பதுகளின் ஆரம்பத்தில் வந்ததாம். ஆனால் என்னைப் பொறுத்த வரை இலக்கியம்தான். மைனர் க்ளாசிக் என்றே சொல்லலாம். ஏன் பிரபலமாக இல்லை என்று தெரியவில்லை.

சாதாரண கரு. ஊரை ஏமாற்றும் கணவன். அவனை நம்பி ஏமாந்து கொண்டிருக்கும் மனைவிக்கு அவன் சுயரூபம் மெதுமெதுவாகத் தெரிகிறது. எப்படி எதிர்கொள்கிறாள்?

திருப்பித் தரும் எண்ணம் அறவே இல்லாமல் கடன் வாங்கி ஊரை ஏமாற்றிக் கொண்டிருக்கும் வாய்ச்சவடால் சம்பத்; காலேஜில் பேராசிரியையாக இருக்கும், முதிர்கன்னியாகிக் கொண்டிருக்கும் ராஜி; (கதை எழுதப்பட்ட காலத்தில் 26-27 வயதே முதிர்கன்னிதான்) சம்பத் வேலைக்குப் போகும் மனைவி இருந்தால் பணப் பிரச்சினை இருக்காது என்று பொய் மேல் பொய் சொல்லி ராஜியை மணம் செய்து கொள்கிறான். இன்னொரு காரணம் பழைய காதலி சுந்தரி ராஜி வீட்டிற்குப் பக்கத்தில் இருப்பது. திருமணத்துக்குப் பிறகு சுந்தரியை மயக்கி தொடுப்பாக வைத்துக் கொள்ளத் திட்டம். பொய் மேல் பொய் தொடர்ந்து நடக்கிறது. ராஜிக்கு சந்தேகம் வந்து, உறுதியும் ஆனவுடன்?

இலக்கியம் ஆக்குவது பாத்திரப் படைப்புதான். சம்பத்தும் ராஜியும் நிஜமானவர்கள். பக்கத்துக்குப் பக்கம் அவர்கள் பாத்திரங்களை செதுக்கி இருக்கிறார். ஒரே சம்பவத்தை பல சமயம் இருவர் பார்வையிலும் விவரிப்பது இன்னொரு சிறப்பான உத்தி. ஏமாற்றுபவன் கண்ணோட்டத்திலிருந்தும் ஏமாறுபவள் கண்ணோட்டத்திலிருந்தும் மாற்றி மாற்றிக் காட்டுகிறார்.

ஹீரோவுக்கு ஒரு ஹீரோயின் என்று ஜெயகாந்தனின் ஒரு சிறுகதை உண்டு. இதே கருதான். ஏமாற்றுக்கார கணவன், ஏமாறும் மனைவி, எப்படி எதிர்கொள்கிறாள் என்பதுதான் கதை. ஜெயகாந்தனின் மதுரமும் சுஜாதாவின் ராஜியும் இருவருமே இலக்கிய நாயகிகள்தான், ஆனால் எத்தனை வித்தியாசம்?

படியுங்கள் என்று பரிந்துரைக்கிறேன்.

தொகுக்கப்பட்ட பக்கம்: சுஜாதா பக்கம்

சுஜாதாவின் “பெண் எந்திரம்”

sujathaசாகச நாவல் என்று பார்த்தால் சுமார்தான், ஆனால் தொடர்கதையாக வந்தபோது நிச்சயமாக வாசகிகளைக் கவர்ந்திருக்கும்.

சிம்பிளான முடிச்சுதான். பன்ச் கார்ட் (பழைய கால கம்ப்யூட்டர்) ஆபரேடர் வித்யா, அவளை உண்மையாக விரும்பும் ப்ரோக்ராமர் கனகசபை, பணக்கார உயர் அதிகாரி கிருஷ்ணகுமார் என்று ஒரு முக்கோணம். வித்யாவின் சம்பளத்தை நம்பித்தான் அவள் குடும்பம் இருக்கிறது. அதனால் வித்யாவின் கல்யாணத்தில் அப்பாவுக்கு விருப்பமில்லை. வித்யாவுக்காக கனகசபை எதையும் விட்டுக் கொடுப்பான் என்று புரிந்து கொள்ளும்போது கனகசபையை வித்யாவின் குடும்பம் குன்சாக ஏற்றுக் கொள்கிறது. இந்த சமயத்தில் வித்யா தான் வாங்கும் சம்பளத்துக்கு மேல் வேலை செய்து கம்பெனியில் மோசடி நடப்பதைக் கண்டுபிடிக்கிறாள். கிருஷ்ணகுமாரிடம் சொல்கிறாள். கனகசபைதான் தில்லுமுல்லு செய்தான் என்று அவனுக்கு வேலை போகிறது. கிருஷ்ணகுமார் வித்யாவை மணம் செய்து கொள்ள விரும்புவதாகச் சொல்கிறார். வித்யாவின் குடும்பத்தை பணத்தால் அடிக்கிறார். பிறகு வழக்கமான சுலபமாக யூகிக்க முடியும் திருப்பங்களுடன் கதை முடிகிறது.

இந்தக் கதையை மீண்டும் படிக்கும்போது எனக்கு தோன்றிய முதல் எண்ணம் இதுதான் – எழுபதுகளிலும் எண்பதுகளிலும் சிவசங்கரியும் லக்ஷ்மியும் அனுராதா ரமணனும் இன்னும் சில பல பெண் எழுத்தாளர்களும் வேலைக்குப் போகும் பெண்களின் பிரச்சினைகளை கருவாக வைத்து நிறைய எழுதித் தள்ளி இருக்கிறார்கள். அப்போதே என்னால் படிக்க முடியவில்லை, இப்போது யாராலும் முடியாது என்று நினைக்கிறேன். ஆனால் இந்த மனிதர் சாகசக் கதைக்கு நடுவே அதே பிரச்சினைகளைப் பற்றி நாலு வரி எழுதுவது இத்தனை உண்மையாக இருக்கிறது. பாலகுமாரனைப் போல பெரிய சத்தம் இல்லாமல் இயல்பாக இருக்கிறது. மனிதருக்கு நிறைய திறமை உண்டு, குமுதம் விகடனில் தொடர்கதை எழுதப்போய் தன் தரத்தை குறைத்துக் கொண்டுவிட்டார்…

இரண்டாவது எண்ணம் இதுதான் – அரைக்கிழமான நானே பஞ்ச் கார்ட் கம்ப்யூட்டர்களைப் பார்த்ததில்லை, பயன்படுத்தி தூக்கி எறியப்பட்ட பஞ்ச் கார்ட்களைத்தான் பார்த்திருக்கிறேன். இவர் பஞ்ச் கார்டுகளைப் பற்றி எழுதுவது இன்றைக்கு யாருக்குப் புரியும்?

சுஜாதா ரசிகர்களுக்காக மட்டும்.

தொகுக்கப்பட்ட பக்கம்: சுஜாதா பக்கம்

சுஜாதாவின் ‘பூக்குட்டி’

Feel-good story.

sujathaபணக்கார வீட்டு ஐந்து வயதுக் குழந்தை விம்முவுக்கு சேரியில் குப்பை பொறுக்கும் பெண் வேலாயியோடும் அவள் நாய் பூக்குட்டியோடும் நட்பு ஏற்படுகிறது. அப்பா அம்மா வழக்கம் போல பிரித்துவிட, விம்முவுக்கு வேலாயியின் நினைவில் ஜுரம் எல்லாம் வருகிறது. டாக்டர் இது ஏக்கம்தான், வேலாயியை அவள் கண்ணில் காட்டுங்கள் என்கிறார். வேலாயியின் குடும்பம் எங்கேயோ போய்விடுகிறது. அப்பா அம்மா போலீஸ் நண்பர்களால் கண்டுபிடிக்க முடியவில்லை. ஆனால் விம்மு விடுவதாக இல்லை, ஒரு நாள் இரவு அவர்களைத் தேடிக்கொண்டு வீட்டை விட்டு வெளியே போய்விடுகிறாள். எப்படியோ விம்முவைக் கண்டுபிடித்து வீட்டிற்கு கூட்டிவந்து அவளுக்கு அறிவுரை எல்லாம் சொல்கிறார்கள். ஆனால் வேலாயிக்கும் அதே நிலைதான், அவளைக் கூட்டிக் கொண்டு அவள் அப்பா விம்முவைப் பார்க்க வருகிறார். தோழிகள் சந்தித்து சுபம்!

கதை முழுவதும் விம்முவின் கண்ணோட்டத்திலிருந்துதான் சொல்லப்படுகிறது. அதிலிருந்து விலகுவதே இல்லை. புன்னகைத்துக் கொண்டே இருந்தேன். விமரிசனம் என்றால் ஒன்றுதான். இது குழந்தைகளுக்கான நாவல் என்று சொல்லப்பட்டாலும் இது பெரியவர்களுக்கான நாவல்தான். குழந்தையின் கண்ணோட்டத்திலிருந்து எழுதப்பட்டிருக்கிறது, அவ்வளவுதான்.

பெரிதாக எழுதவே இஷ்டமில்லை. இதையெல்லாம் அனுபவிக்க வேண்டும், ஆராயவே கூடாது. படித்துக் கொள்ளுங்கள்.

தொகுக்கப்பட்ட பக்கம்: சுஜாதா பக்கம்

சுஜாதாவின் “தீண்டும் இன்பம்”

sujathaசுஜாதாவுக்கு நிறைய ஆசை. பதின்ம வயதில் கர்ப்பம் ஆகும் பெண்கள், சிறு குழந்தைகளை மேலை நாடுகளில் தத்துக் கொடுப்பதில் உள்ள தகிடுதத்தங்கள், எய்ட்ஸ் நோயாளிகளின் சோகங்கள், எமிலி டிக்கின்ஸனின் கவிதைகள் எல்லாவற்றையும் பற்றி எழுத ஆசைப்பட்டிருக்கிறார். அத்தனையையும் ஒரு சிறு நாவலில் கலந்துகட்டி அடித்துவிட்டார்.

theendum_inbamகல்லூரியில் படிக்கும் பதினேழு வயதுப் பெண் பாட்டுப் போட்டியில் வெல்கிறாள். அதைக் கொண்டாட நடத்தும் பார்ட்டியில் தற்செயலாக உடலுறவு. கர்ப்பம். காலேஜ் ரௌடி ரகுவுக்கு இந்தக் கர்ப்பம் பற்றி விஷயம் தெரிந்து உறவு கொண்டவனை அடிக்க அவன் இறந்தே போகிறான். கர்ப்பத்தை கலைக்க முயற்சி செய்கிறாள். ஒரு “தொண்டு அமைப்பு” அவளை குழந்தை பெற்றுக்கொண்டு தத்துக் கொடுக்கும்படி மனதை மாற்றுகிறது. ஆனால் குழந்தையைப் பார்த்த பிறகு பாசம் ஏற்பட்டு அதை தத்துக் கொடுக்க மறுக்கிறாள். சில நாட்களில் குழந்தை வளர்ப்பதில் உள்ள சிரமங்களைப் புரிந்து கொண்ட பிறகு அவள் மனம் மாறி தத்துக் கொடுக்க ஒத்துக் கொள்கிறாள். நடுவில் ரகுவுக்கு எய்ட்ஸ் என்று தெரிய வருகிறது. குழந்தையப் பார்த்துக் கொள்ள சிரமப்படும்போது அவளுக்கு உதவி செய்ய முன்வருபவன் ரகு மட்டுமே. எய்ட்ஸ் என்று பழைய நண்பர்கள் அவனைத் தவிர்க்கும்போது இவள் மட்டும் அவனைப் புரிந்து கொள்கிறாள்.

சுஜாதா இந்த நாவலை சிறப்பாக கொண்டு வந்திருக்கலாம். நல்ல பாத்திரப் படைப்புகள். பல நல்ல காட்சிகள். (உறவு கொள்ளும் காட்சி, காதல் இல்லை என்று ஒரு நண்பன் விலகுவது…) சிறப்பான நாடகமாக எழுதி இருக்கலாம். ஆனால் தொடர்கதை என்ற format அவரை அமுக்கிவிடுகிறது. பல விஷயங்களைப் போட்டு குழப்பிவிடுகிறார். வடிவகச்சிதம் அமையவில்லை. தொடர்கதை format திறமை உள்ளவர்களையே கவிழ்த்துவிடக் கூடியது என்பதற்கு நல்ல உதாரணம்.

தொகுக்கப்பட்ட பக்கம்: சுஜாதா பக்கம்