டோரதி சேயர்ஸ் எழுதிய Murder Must Advertise

சேயர்ஸ் துப்பறியும் கதை எழுத்தாளர்களில் குறிப்பிட வேண்டியவர். எனக்குப் பிடித்த துப்பறியும் கதை எழுத்தாளர்களில் ஒருவர். Golden Age of Detective Fiction என்று அறியப்படும் காலகட்டத்தின் முக்கியப் பங்களிப்பாளர்.

சேயர்ஸின் படைப்புலகம் இரண்டு உலகப் போர்களுக்கு இடைப்பட்டது. பிரபு குடும்பத்தைச் சேர்ந்த, பணக்கார பீட்டர் விம்சி அனேகக் கதைகளில் துப்பறிபவராக வருவார். கதைகள் எப்போதும் விறுவிறுப்பாக இருந்துவிடாது. ஆனால் அனேகக் கதைகளில் முடிச்சு நன்றாக இருக்கும், விம்சி அதை அருமையாக அவிழ்ப்பார். ஆனால் சேயர்சின் கதைகள் எனக்குப் பிடிக்க முக்கியமான காரணம் மர்மங்கள் அல்ல; எப்படியோ இரண்டு உலகப் போர்களுக்கு நடுவேயான காலகட்டத்தை, அன்றைய பணக்காரர்கள், முக்கியத்துவத்தை, பணத்தை, சொத்து சுகம் சௌகரியங்களை, மதிப்பை இழந்து கொண்டிருக்கும் பிரபு குடும்பத்தவர்கள், போருக்குப் பிறகான வெறுமையை உணரும் அன்றைய ஜென்டில்மென் வர்க்கம், விடுதலையை உணரத் தொடங்கி இருக்கும் பெண்கள் என்று சித்தரிப்பது உண்மையாக இருப்பதால்தான்.

Murder Must Advertise (1933) நல்ல உதாரணம். விளம்பர நிறுவனத்தில் வேலை செய்யும் விக்டர் டீன் மாடிப்படிகளில் விழுந்து இறந்து போகிறார். விபத்து என்று தீர்ப்பு வந்துவிட்டாலும் முதலாளிக்கு சின்ன உறுத்தல். விம்சி வேறு பெயரில் விளம்பரக் கம்பெனியில் வேலைக்கு சேர்கிறார். போதை மருந்து வியாபாரத்துக்கான ஒரு சரடும் சென்று கொண்டிருக்கிறது. விம்சி எல்லா முடிச்சுகளையும் அவிழ்க்கிறார்.

நாவலை உயர்த்துவது விளம்பரக் கம்பெனியின் சித்தரிப்புதான். இன்றும் காலாவதி ஆகிவிடாத சித்தரிப்பு. காப்பிரைட்டர்கள், ஓவியர்கள், பத்திரிகைகளின் காலக் கெடுபிடிகள், விளம்பரம் கொடுக்கும் கம்பெனிகள், அவர்களுக்கு நடுவே உள்ள போட்டிகள் எல்லாம் மிகச் சிறப்பாக சித்தரிக்கப்படுகின்றன. என் கண்ணில் இது மர்ம நாவல் அல்ல; இலக்கியமே. என்ன, இரண்டாம், மூன்றாம் வரிசை இலக்கியம்.

பத்திரிகையில் விளம்பரம் வெளிவருவதற்கு முன் அதைப் பற்றிய குறிப்பு ஒன்றை பெற்றுக் கொண்டு அதை வைத்து போதை மருந்து வியாபாரம் நடைபெறுகிறது என்பதுதான் முடிச்சு. இது அந்த போதை மருந்து கூட்டத்துக்கு மட்டும்தான் புரியும் குறிப்பு. இரண்டு நாள் கழித்து பத்திரிகை வெளிவந்த பிறகு அதே குறிப்பை வைத்து அதே வியாபாரத்தை செய்யலாமே, முன்னாலேயே பெறுவதால் என்ன லாபம்? வேறு யாருக்கும் புரியப் போவதில்லையே? படிக்கும்போது இந்த மாதிரி கேள்வி எதுவும் மனதில் எழாததுதான் இந்த நாவலின் வெற்றி.

சேயர்ஸ் இந்த நாவலை எழுதும்போது விளம்பர நிறுவன உலகம் மற்றும் அன்றைய வெறுமையால் பார்ட்டி, குடி, போதை என்று அலையும் பணக்கார இளைஞர்/இளைஞிகளின் உலகம் இரண்டையும் விவரிக்க நினைத்தாராம். ஒன்றில்தான் வெற்றி பெற்றிருக்கிறார். அவரே அதை ஒத்துக் கொண்டாராம்.

படியுங்கள் என்று பரிந்துரைக்கிறேன்.

தொகுக்கப்பட்ட பக்கம்: துப்பறியும் கதைகள்

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out /  மாற்று )

Google photo

You are commenting using your Google account. Log Out /  மாற்று )

Twitter picture

You are commenting using your Twitter account. Log Out /  மாற்று )

Facebook photo

You are commenting using your Facebook account. Log Out /  மாற்று )

Connecting to %s

This site uses Akismet to reduce spam. Learn how your comment data is processed.