சுய அறிமுகம்

ஏழு வயதில் என் அம்மா எங்கள் கிராமத்து நூலகத்தில் உறுப்பினராக சேர்த்துவிட்டார். அப்போதிலிருந்தே ஒரு வாசிப்பு பைத்தியம் தொடங்கிவிட்டது. எல்லாவற்றையும் படிக்கும் பழக்கம். இன்று அரைக் கிழமாக ஆன பிறகும் ஹாரி பாட்டரைக் கூட விடுவதில்லை.என் வாசிப்பு அனுபவத்தை பகிர்ந்து கொள்ளவே இந்த வலைப்பதிவு. இது வரை கிட்டத்தட்ட 2000 பதிவுகள்; 3000 புத்தகங்கள் பற்றியாவது எழுதி இருப்பேன் என்று நினைக்கிறேன்.

எனக்கு எந்த மாதிரி வாசிப்பு பிடிக்கும் என்று உங்களுக்கு ஒரு மனச்சித்திரம் கிடைப்பதற்காக;  பிடித்த புத்தகங்கள் என்றால் உடனே நினைவுக்கு வருபவை:

• மகாபாரதத்தை விட சிறந்த இலக்கியம் இல்லை என்றே கருதுகிறேன். மகாபாரதப் பித்தன் என்றே சொல்லலாம். அடுத்த படியாக ராமாயணம். பொதுவாகவே  தொன்மங்கள் என்னை ஈர்க்கின்றன. நவீன தொன்மங்களான Lord of the Rings உட்பட.
• நாடகங்களில் ஷேக்ஸ்பியர் – குறிப்பாக மாக்பெத், இப்சன், பெர்னார்ட் ஷா, பெர்டோல்ட் ப்ரெக்ட், ஆர்தர் மில்லர், டென்னசி வில்லியம்ஸ்
• உலக மொழிகளில்: One Hundred Years of Solitude, All Quite on the Western Front, To Kill a Mockingbird, Ah, But Your Land is Beautiful, Les Miserables
• இந்திய மொழிகளில்: யயாதி, ஃபனீஷ்வர் நாத் ரேணுவின் கதைகள், மணிக் பந்தோபாத்யாயின் கதைகள், பிரேம்சந்த், எஸ்.எல். பைரப்பாவின் நாவல்கள்
• தமிழில்: புதுமைப்பித்தன், அசோகமித்ரன், ஜெயமோகன் மூவரையும் தமிழில் மேதைகள் என்று கருதுகிறேன். அடுத்த படியில் நிறைய பேர் இருக்கிறார்கள்.
• என் வாசிப்பில் குறையாகக் கருதுவது நான் ரஷியப் பேரிலக்கியங்களை இன்னும் படிக்காதது. Crime and Punishment, War and Peace இரண்டும் ரொம்ப நாளாக அலமாரியில் தூங்குகின்றன
• இன்றும் த்ரில்லர்களை விரும்பிப் படிப்பவன். இருபதாம் நூற்றாண்டின் முற்பகுதியில் எழுதப்பட்ட ஆங்கில துப்பறியும் எழுத்தாளர்கள் (ஷெர்லாக் ஹோம்ஸ், அகதா கிறிஸ்டி, டாக்டர் தார்ண்டைக், ராஃபிள்ஸ், மாக்ஸ் காரடோஸ், ஆஃப்ரிக்கன் மில்லியனர்…) என்றால் ஒரு மோகம் உண்டு.
• நாஸ்டால்ஜியாவுக்காக படிப்பது, மீள்வாசிப்பு நிறைய உண்டு. இளமைக் காலத்தில் உள்ளம் கவர்ந்த ஹீரோக்களான இரும்புக் கை மாயாவி, ஜானி நீரோ ஆகியோரின் கதைகளையும் நாஸ்டால்ஜியாவுக்காக படிப்பேன்.

ஏன் படிக்கிறேன் என்ற கேள்வி உண்டு. அதைப் பற்றி இங்கே விலாவாரியாக எழுதி இருக்கிறேன்.

தமிழ் வாசிப்புக்கு நான் references-களாக பயன்படுத்தும் இணைய சுட்டிகள், தளங்களை இந்தப் பதிவில் தொகுத்திருக்கிறேன்.

எழுத வேண்டும் என்று ஆசை, பல கதைகள் மனதில் ஓடுகின்றன, சில சிறுகதைகள் மட்டுமே வெளியிட்டிருக்கிறேன். எழுதியவற்றில் பெரும்பான்மை மகாபாரதத்தை அடிப்படையாகக் கொண்டவை. ஒரு கதை – அம்மாவுக்கு புரியாது – பரிசு பெற்றிருக்கிறது.