என்னது இந்திரா காந்தி செத்துட்டாரா பதிவு 2
எஸ்.ரா.வுக்கு சாஹித்ய அகடமி விருது கிடைத்திருப்பது சந்தோஷமான விஷயம். விருதுக்கு தகுதி உள்ளவர். அவர் எழுதிய புத்தகங்களில் எனக்கு மிகவும் பிடித்தமானது உறுபசி. நான் படித்தவை உறுபசி, நெடுங்குருதி, உபபாண்டவம் மூன்றும்தான். சஞ்சாரம் புத்தகத்திற்கு விருது கிடைத்திருக்கிறது, வாங்க வேண்டும்.
சாஹித்ய அகடமிக்கு ஒரு ஜே!
தொகுக்கப்பட்ட பக்கம்: எஸ்.ரா. பக்கம், விருதுகள்
எஸ். ராமகிருஷ்ணனின் தாவரங்களின் உரையாடல் ஒரு அதீத, அமானுஷ்ய சூழ்நிலையை சித்தரிக்கிறது. நன்றாகவே சித்தரிக்கிறது. ஆனால் அமானுஷ்ய சூழ்நிலை என்பது மட்டுமே உள்ள, அதைத் தாண்டாத சிறுகதைகளை எழுத்தாளர் பார் எனக்கு எப்படி எல்லாம் எழுதத் தெரியும் என்று பீற்றிக் கொள்வதாகவே எனக்குத் தோன்றுகிறது. நேரடியாக, ஆனால் ஆரவாரம் இல்லாத எம்.ஆர். ஜேம்ஸ் போன்றவர்களின் எழுத்துக்களே என்னைக் கவர்கின்றன. மேலும் எம்.ஆர். ஜேம்ஸே இலக்கியம் படைத்துவிடவில்லை, சும்மா ஒரு genre-இல் சிறந்த படைப்புகளை எழுதி இருக்கிறார் என்று எண்ணும்போது இந்தச் சிறுகதை எல்லாம் முக்கியமானவையே அல்ல.
நான் இந்தச் சிறுகதையைப் படிக்க ஒரே காரணம்தான் – ஜெயமோகனின் சிறந்த தமிழ் சிறுகதைகள் பட்டியலில் தாவரங்களின் உரையாடல் இடம் பெறுகிறது. ஆனால் அவரே இந்தச் சிறுகதையை ‘ஒட்டுமொத்தமாக எழுதப்பட்ட காகித மதிப்புக்கூட இல்லாத குப்பை’ என்று வேறொரு இடத்தில் காட்டமாக விமர்சிக்கிறார். பட்டியல் போட்டபோது இருந்த உங்கள் கருத்துக்கள் மாறிவிட்டனவா என்று கேட்டபோது அவர் ‘இந்தக் கதை எனக்கு முக்கியமானதல்ல, ஆனால் தமிழில் பொதுவாக முக்கியமானது, நான் என் அழகியல் நோக்கு மட்டுமே வெளிப்படும் பட்டியலைப் போடவில்லை’ என்று விளக்கம் அளித்தார். விளக்கம் என்னை திருப்திப்படுத்தவில்லை.
எதற்காக ஜெயமோகனின் பட்டியலை முக்கியமானதாகக் கருதுகிறோம்? ஒரே காரணம்தான் – அவரது ரசனை மீதுள்ள நம்பிக்கை. குப்பைகளைத் தேர்ந்தெடுக்கமாட்டார் என்று எண்ணுகிறோம். அதனால்தான் அவரது பட்டியலில் உள்ள சிறுகதைகளைத் தேடிப் பிடித்து படிக்கிறோம். காகித மதிப்பு கூட இல்லாத குப்பை, ஆனால் தமிழில் முக்கியமான சிறுகதை என்ற இரண்டு எண்ணங்களும் ஒரே நேரத்தில் ஒருவர் மனதில் இருக்க முடியாது. அன்று அப்படி எண்ணினேன், இன்று என் எண்ணம் மாறிவிட்டது என்றால் சரி. இல்லை முன்னோடி முயற்சி, இன்று காலாவதி ஆகிவிட்டது என்றால் அது வேறுவிதம். குப்பை, ஆனால் தமிழில் ஒரு genre-இன் பிரதிநிதி, இல்லை ஒரு காலகட்டத்தின் பிரதிநிதி, இல்லை ஒரு இயக்கத்தின் பிரதிநிதி, அதனால் முக்கியமானது என்றால் கல்கி, துப்பறியும் சாம்பு, ரா.கி. ரங்கராஜன், பாக்யம் ராமசாமி, சிவசங்கரி, கோவி. மணிசேகரன் எல்லாரும் கூட பிரதிநிதித்துவப்பட வேண்டும்.
வாசகன் எதற்காக தன் நேரத்தை வீணடித்து குப்பைகளை படிக்க வேண்டும்? ஜெயமோகன் ஆடுவது போங்காட்டம் என்றே நான் கருதுகிறேன். குறைந்தபட்சம் அவர் ஒரு disclaimer ஆவது போட்டிருக்க வேண்டும். மிச்சம் இருக்கும் சிறுகதைகளில் எது உண்மையிலேயே அவர் பரிந்துரைப்பது, எதெல்லாம் அவர் ஏதோ கல்லூரி பேராசிரியர் மனநிலையில் தேர்ந்தெடுத்தது என்று எப்படி கண்டுபிடிப்பது?
ஜெயமோகனிடம் ஏதாவது கருத்து வேறுபாடு ஏற்பட்டால் நேரடியாக கேட்டுவிடுவேன், இங்கிதம் எல்லாம் பார்க்கமாட்டேன். அவரும் அனேகமாக விளக்கம் சொல்லிப் பார்ப்பார், நான் விடாமல் வாதித்துக் கொண்டே இருந்தால் ஒரு கட்டத்துக்கு மேல் கிடக்கிறான் பிராந்தன் என்று விட்டுவிடுவார். 🙂 இந்த விஷயத்திலும் அப்படித்தான் நடந்தது. எனக்கு ஏமாற்றம்தான். இப்போதெல்லாம் அவரது சிறுகதைத் தேர்வு பட்டியலை நான் சந்தேகத்துடன்தான் அணுகுகிறேன்…
தொகுக்கப்பட்ட பக்கம்: இலக்கிய விமர்சனம், ஜெயமோகன் பக்கம், எஸ்.ரா. பக்கம்
எஸ்.ரா.வின் நூறு சிறந்த தமிழ் சிறுகதைகள் என் reference-களில் ஒன்று. தொகுப்புகள் தளத்தில் இவற்றில் சில தவிர மிச்ச அனைத்துக்கும் இணைப்புகள் கொடுத்திருக்கிறார்கள். அருணா உபயத்தில் தெரிய வந்தது. சிங்கமணிக்கு ஒரு ஜே!
சிங்கமணியும் ஜெயமோகன் தேர்வுகளைத் தொகுக்கும் முயற்சியில் ஈடுபட்டிருப்பது அப்போதுதான் தெரிந்தது. இன்றைக்கு எங்கள் லிஸ்டில் அதிக இணைப்புகள் இருப்பதால் அதை தொடர வேண்டி இருக்கிறது…
அழியாச்சுடர்கள், தொகுப்புகள், ஓப்பன் ரீடிங் ரூம் தொகுப்பாளர்கள் மிச்ச சிறுகதைகளை தேடிப் பதிப்பித்தால் இன்னும் சவுகரியம். குறிப்பாக பல ஈழ எழுத்தாளர்களின் சிறுகதைகள் நூலகம் தளத்தில் புத்தகங்களின் ஒரு பகுதியாகக் கிடைக்கிறது. pdf வடிவத்திலிருந்து கட் பேஸ்ட் செய்யும் வசதி எனக்கு கிடையாது. அதனால் மொத்த புத்தகத்துக்கும் சுட்டி கொடுத்திருக்கிறேன். அதை அப்படி கட் பேஸ்ட் செய்ய முடிந்தால் வசதியாக இருக்கும்.
தொகுக்கப்பட்ட பக்கம்: References, எஸ். ராமகிருஷ்ணன் பக்கம்
தொடர்புடைய சுட்டி: ஜெயமோகன் தேர்ந்தெடுத்த தமிழ் சிறுகதைகள்
எஸ்.ரா.வின் நூறு சிறந்த சிறுகதைகள் பட்டியலைப் பற்றி கேள்விப்பட்டிருக்கலாம். என் reference-களில் ஒன்று. நூறு சிறுகதையை எப்படி நினைவு வைத்துக் கொள்வது என்று யோசிப்பவர்களுக்காக இந்தப் பதிவு.
சமீபத்தில் எஸ்.ரா. மலேசியாவில் சிறுகதை பயிலரங்கு ஒன்றை நடத்தி இருக்கிறார். அங்கே பங்கேற்றவர்களுக்காக பத்து உதாரண சிறுகதைகளை வைத்து பாடம் நடத்தி இருக்கிறார். அந்தப் பட்டியல் கீழே:
தொகுக்கப்பட்ட பக்கங்கள்: எஸ்.ரா. பக்கம், தமிழ் சிறுகதைகள், சிபாரிசுகள்
தொடர்புடைய சுட்டிகள்: எஸ்.ரா.வின் நூறு சிறந்த தமிழ் சிறுகதைகள் பட்டியல்
