சொல்வனம் – தி.ஜானகிராமன் சிறப்பிதழ்

சொல்வனம் இணைய பத்திரிகை ஆரம்பித்து ஐம்பது இதழ்கள் வந்துவிட்டனவாம். ஐம்பதாவது இதழை தி.ஜா.வைப் பற்றி ஒரு சிறப்பிதழாக வெளியிட்டிருக்கிறார்கள்.

கரிச்சான் குஞ்சு, வெங்கட் சாமிநாதன், எம்.வி. வெங்கட்ராம், சிட்டி, சுஜாதா, அ. முத்துலிங்கம், தஞ்சை பிரகாஷ் எல்லாரும் அவரைப் பற்றி எழுதி இருக்கிறார்கள். அதுவும் கரிச்சான் குஞ்சு அவரது நெருங்கிய நண்பர் போலிருக்கிறது. பல பர்சனல் நினைவுகளைப் பற்றி எழுதி இருக்கிறார். எம்விவி கல்லூரி நண்பராம். அவர் பித்துப் பிடித்தாற்போல இருந்தபோது தி.ஜா. செய்த உதவிகளைப் பற்றி வெளிப்படையாகவே எழுதி இருக்கிறார்.

அசோகமித்திரன் பேட்டி கொடுத்திருக்கிறார். மனிதர் மகா நேர்மையானவர் – சிம்பிளாக இன்னும் ஐம்பது வருஷம் போனால்தான் அவருக்கு இப்போது இருக்கும் ஒளிவட்டம் மங்கும், அப்போதுதான் அவரைப் பற்றி விமர்சிக்க முடியும் என்கிறார். தி.ஜா.வே ஒரு பேட்டி கொடுத்திருக்கிறார். சிலிர்ப்பு, கண்டாமணி ஆகிய கதைகள் எப்படி உருவாயின என்பதைப் பற்றி சொல்லி இருக்கிறார். குழந்தைக்கு ஜுரம், இசைப்பயிற்சி, ஆயிரம் பிறைகளுக்கப்பால் என்று மூன்று கதைகளை வேறு பதித்திருக்கிறார்கள். (பலரும் சிலாகித்த அந்த கண்டாமணி கதையைப் பதித்திருக்கக் கூடாதா? அதை நான் இன்னும் படித்ததில்லை…) குழந்தைக்கு ஜுரம் கதையில் எம்விவியை வைத்து எழுதி இருக்கிறார் என்று நினைக்கிறேன்.

கரிச்சான் குஞ்சு, அவரது மகள், மற்றும் பலர் எழுதுவதிலிருந்து தி.ஜா. நன்றாகப் பாடக் கூடியவர் என்று தெரிகிறது. முயன்றிருந்தால் கச்சேரியே செய்திருக்கலாம் என்று தெரிகிறது. சமீபத்தில் ஜெயமோகன் எழுதிய அறம் சீரிஸ் கதைகளைப் படித்துவிட்டு தி.ஜா.வுக்கு சங்கீத ஞானம் அதிகம், ஆனால் பாட வராது என்று நினைத்திருந்தேன். ஜெயமோகன் creative license எடுத்துக் கொண்டாரா என்று தெரியவில்லை. உண்மை மனிதர்களைப் பற்றி எத்தனை தூரம் creative license எடுத்துக் கொள்ளலாம் என்று ஒரு கேள்வி எழுகிறது.

தி. ஜானகிராமனின் “நளபாகம்”

நண்பர் ஒருவர் சொன்னார் – மோகமுள்ளை இப்போது படிக்க முடியவில்லை, அலுப்பாக இருக்கிறது என்று. தி.ஜானகிராமன் போன்ற icon அலுத்துப் போகிறாரா என்று ஆச்சரியப்பட்டேன். கரெக்டாக இந்த நாவலும் அப்போது கிடைத்தது. சரி என்று படிக்க ஆரம்பித்தேன்.

தி.ஜா.வின் மீது எனக்கு எப்போதும் உள்ள விமர்சனம் மனிதர் அரைத்த மாவையே அரைக்கிறார் என்பதுதான். எப்போதும் அந்த தஞ்சாவூர் பண்ணையார் அல்லது அக்ரஹாரம் வாழ்க்கை, எப்போதும் ஏதோ ஒரு “தவறான” உறவு. தோசை, மசால் தோசை, ஊத்தப்பம், பெசரட், வெங்காய தோசை என்று மாற்றி மாற்றிப் போட்டாலும் அந்த மாவின் லேசான புளிப்பு சுவைதானே மீண்டும் மீண்டும்!

இதைப் படிக்கும்போதும் அதே விமர்சனம்தான். அதே தஞ்சாவூர் கிராமம். இந்த முறை “தவறான” உறவு மனரீதியாக மட்டும். அதே மாதிரி தி.ஜா. டைப் மனிதர்கள். அதே மாதிரி பேச்சு. சுமாரான கதைப்பின்னல்.

இந்த முறை ஊரின் பேர் நல்லூர். நல்லூர் ரங்கமணி அம்மாள் குடும்பத்தில் எப்போதும் ஸ்வீகாரப் பிள்ளைதான், குழந்தை பிறப்பதே இல்லை. ரங்கமணி யாத்திரை போகும்போது சமையல்கார காமேஸ்வரனை சந்திக்கிறாள். ஏறக்குறைய தன் மகனாக வரித்துக் கொள்கிறாள். அதே யாத்திரையில் ஜோசியர் முத்துசாமி ரங்கமணியின் தத்துப் பிள்ளை மற்றும் மருமகள் இல்லை இல்லை மாட்டுப்பெண் ஜாதகத்தைப் பார்த்துவிட்டு உங்கள் பையனுக்கு குழந்தை கிடையாது, மாட்டுப்பெண்ணுக்கு உண்டு என்கிறார். சரி வழக்கமான முடிச்சைப் போட்டுவிட்டார் என்று நினைத்தேன்.

ரங்கமணி காமேஸ்வரனை தன் வீட்டுக்கு வந்து இருக்கும்படி அழைக்கிறாள். காமேஸ்வரனும் போகிறான். நியோக முறைப்படி காமேஸ்வரன் மூலமாக தனக்கு ஒரு பேரனைப் பெற்றுக் கொள்ளலாம் என்று ரங்கமணிக்கு ஒரு ஐடியா இருக்கிறது. மருமகள் பங்கஜத்துக்கும் காமேஸ்வரன் மேல் ஈர்ப்பு இருக்கிறது. காமேஸ்வரனுக்கு ரங்கமணியின் ஐடியா தெரியாவிட்டாலும் தி.ஜா.வின் வழக்கமான அழகான பெண்கள் மீது வழக்கமாக ஏற்படும் ஈர்ப்பு பங்கஜத்தின் மேல் இருக்கிறது. இரண்டு பேரும் வெளியே காட்டிக்கொள்ளவில்லை. காமேஸ்வரன் மெதுமெதுவாக குடும்பத்தில் ஒருவராக ஆகிறான்.

காமேஸ்வரனுக்கு விஷயம் தெரியும்போது அதிர்கிறான். தற்செயலாக பங்கஜத்தை தனியாக சந்திக்க நேரிடுகிறது. பங்கஜத்துக்கும் ஆசை உண்டு என்று தெரிகிறது. ஆனால் கையைத் தொடுவதற்கு மேல் போகவில்லை. அது என்னவோ ஒரு catharsis மாதிரி பங்கஜத்துக்கு – அவள் தன் கணவன் துரையோடு ஒன்று சேர்கிறாள். இங்கே என்னவோ தி.ஜா. கணவன் மனைவி இது வரை சேராதது மாதிரி ஒரு ஃபில்ம் காட்டுகிறார். எப்படி சார்? பங்கஜம் கர்ப்பம் ஆகிறாள்.

காமேஸ்வரனுக்கு ஊரில் நட்பு வட்டம் பெருகுகிறது. தி.க.வைச் சேர்ந்த இளங்கண்ணன் முதற்கொண்டு நண்பர்கள். உள்ளூர் ஸ்கூலில் அனேகமாக தலித் மாணவர்கள் சாப்பிடும் மதிய உணவின் தரத்தைக் காணும் காமேஸ்வரன் பிடி அரிசி என்று ஒரு திட்டத்தைக் கொண்டு வருகிறான். உலை போடும் முன் ஒரு பிடி அரிசியைத் தனியாக எடுத்து வைத்துவிடவேண்டும். நன்கொடை வசூலிக்கிறான். எல்லாரும் சேர்ந்து நல்ல மதிய உணவை மாணவர்களுக்கு போடுகிறார்கள். (இந்த பிடி அரிசி திட்டம் மறைந்த காஞ்சி சந்திரசேகரேந்திர சரஸ்வதி அவர்களின் ஐடியாவாம். நல்ல ஐடியாவாக இருக்கிறதே! ஏன் அவ்வளவாக வெளியே தெரியவில்லை?)

ஆனால் ஊரில் தன்னையும் பங்கஜத்தையும் வைத்து அபவாதம் இருப்பதை உணரும் காமேஸ்வரன் நல்லூரை விட்டு வெளியேறுகிறான். அத்தோடு கதை முடிகிறது.

கதையின் பலம் வழக்காமானவைதான்: மொழி, சரளம், கதாபாத்திரங்கள். அது என்னவோ தி.ஜா.வின் நடை கோடைக்காலத்தின் மெல்லிய குளிர்ந்த காவேரியைத்தான் எனக்கு நினைவுபடுத்துகிறது. தி.ஜா.வின் மனிதர்கள் – இளங்கண்ணன், ஜோசியரின் மனைவி, காமேஸ்வரன் குடியிருக்கும் அறையின் வீட்டு ஓனர் என்று பலர் மிக நல்ல சித்திரங்கள்.

பலவீனங்கள் என்று பார்த்தால் பையனுக்கு குழந்தை இல்லை, மருமகளுக்கு மட்டும்தான் குழந்தை என்று ஒரு முடிச்சு போட்டார். அதை அவிழ்க்கவே இல்லையே? முத்துசாமி ஜோசியர் இப்படி அபவாதம் வந்ததைத்தான் சொன்னேன் என்று சொல்வது வெறும் சப்பைக்கட்டாக இருக்கிறது. அப்புறம் என்னதான் பாயின்ட்?

சில சமயம் எனக்குத் தோன்றுகிறது – தி.ஜா.வின் எந்தக் கதையை முதலில் படித்தாலும் அது பிடித்துப் போகும். அதற்கப்புறம் படிக்கும் கதைகளில் ஒரு மாதிரி deja vu உணர்வு ஏற்பட்டு அலுக்க ஆரம்பித்துவிடும் என்று. ஒரு சூழல் மீண்டும் மீண்டும். பி.ஜி. உட் ஹவுசின் 46-ஆவது கதையைப் படிக்கிற மாதிரி.

படிக்கலாம். நிச்சயமாக above average. சுவாரசியமான பாத்திரங்கள், நடை உள்ள கதை. ஆனால் repetitive தி.ஜா.

இதுதான் தி.ஜா.வின் கடைசி நாவலாம். கணையாழியில் தொடர்கதையாக வந்ததாம்.

உடுமலை தளத்தில் கிடைக்கிறது. விலை 135 ரூபாய்.

தி. ஜானகிராமனின் சிறுகதை – பாயசம்

தி.ஜா.வின் இன்னொரு பிரமாதமான கதையை இன்று அழியாச்சுடர்கள் ராம் பதித்திருக்கிறார். பாயசம் கதையை விட மனித மனத்தின் அசூயையை, பொறாமையை, உறவுகளுக்குள்ளே இருக்கும் ஈகோ பிரச்சினைகளை அருமையாக சொல்லிவிட முடியாது. மிஸ் செய்யாமல் படியுங்கள்!

இந்த சிறுகதையை ஜெயமோகன், எஸ்.ரா. இருவரும் சிறந்த தமிழ் சிறுகதை லிஸ்டில் சேர்த்திருக்கிறார்கள்.

தொகுக்கப்பட்ட பக்கம்: தமிழ் சிறுகதைகள், தி. ஜானகிராமன்

தொடர்புடைய சுட்டி: பாயசம் சிறுகதை

தி. ஜானகிராமனின் “கொட்டுமேளம்”

க.நா.சு. தன் “படித்திருக்கிறீர்களா?” புத்தகத்தில் சிபாரிசு செய்த இன்னொரு புத்தகம். சிறுகதைத் தொகுப்பு. நண்பர் ராஜனிடம் இருந்து இரவல் வாங்கியது. அதில் உள்ள சிறுகதைகளைப் பற்றி.

கொட்டுமேளம்: ஒரு பிழைக்கத் தெரியாத டாக்டர், அவருக்கேற்ற காதலி. நல்ல கதை.
சண்பகப் பூ: அழகான இளம் பெண் விதவையாகி நிற்கிறாள். கணவனின் அண்ணனோடு உறவு என்பதை சொல்லாமல் சொல்கிறார். எழுத்துக் கலை கை வந்தவர்!
ரசிகரும் ரசிகையும்:அருமையாக எழுதப்பட்ட கதை. வித்வான், ரசிகத்தன்மை உள்ள தாசி. திருவையாறு உற்சவம் என்று அவர் போவதே அவளைப் பார்க்கத்தான். சரசமாடும்போது தியாகையரைப் பற்றி வித்வான் கொஞ்சம் மட்டமாக சொல்லிவிட விரட்டிவிடுகிறாள்!
கழுகு: சாகப் போகிறார் என்று ஊரே எதிர்ப்பார்க்கிறது. ஒவ்வொரு முறையும் வேறு யாராவது போகிறார்கள்.
பசி ஆறிற்று:சாமிநாத குருக்கள்-அகிலாண்டம் பொருத்தமில்லாத திருமணம். அகிலா பக்கத்து வீட்டு ராஜத்தை சைட் அடிக்கிறாள். ஆனால் ஒரு தருணத்தில் அவள் மனம் தெளிந்துவிடுகிறது. அந்த ஒரு நிமிஷத்தை அருமையாக எழுதி இருக்கிறார்.
வேண்டாம் பூசணி: வயதான அம்மா, விட்டுப்போன சொந்தங்கள். இன்றும் அதே கதைதானே! நல்ல கதை.
இக்கரைப் பச்சை, அத்துவின் முடிவு: இரண்டிலும் அதே பாத்திரங்கள்தான். முதல் கதையில் அத்து கொழிக்கிறார், கதைசொல்லி வீட்டில் கொஞ்சம் பற்றாக்குறைதான். அத்துவை அவர் மனைவி மதிப்பதில்லை என்று தெரியும்போது இக்கரைப் பச்சை என்று நினைத்துக் கொள்கிறார். இரண்டாவது கதையில் அத்து செத்துக் கொண்டிருக்கிறார். அவர் மனைவி அவரை சீந்துவதில்லை. அத்து இறந்தபிறகு அவரது சொத்தை விட கடன் அதிகம் என்று தெரியவருகிறது.
நானும் எம்டனும்: சின்னப் பையன், மூழ்கும் பையனை காப்பாற்ற தன் உயிரைக் கொடுக்கிறான்.
பொட்டை: குருடான சன்னாசியை உத்தண்டியாரின் தத்துப் பிள்ளை கொஞ்சம் தரக் குறைவாக பொட்டை என்று அழைக்கிறான். அவனை ஒரு பெண்ணோடு கோவிலில் சன்னாசி கையும் களவுமாக பிடிக்கிறான்.
தவம்: செல்லூர் சொர்ணாம்பா புகழ் பெற்ற தாசி. அவளிடம் போக ஆசைப்படும் ஏழை சிங்கப்பூர் சென்று வருஷக்கணக்கில் உழைத்து சம்பாதிக்கிறான். திரும்பும்போது அவள் கிழவி.
சிலிர்ப்பு: ஏழை குழந்தைக்கு கருணை காட்டும் பற்றாக்குறை குடும்பத்தின் சின்னப் பையன். மிக நன்றாக எழுதப்பட்ட கதை.

சிலிர்ப்பு இந்த தொகுப்பின் சிறந்த சிறுகதை. பசி ஆறிற்று, தவம் நல்ல கதைகள். மற்ற கதைகளும் சோடை போகவில்லை.

சிலிர்ப்பு சிறுகதையை ஜெயமோகனும் தி.ஜா.வின் சிறந்த சிறுகதைகளில் ஒன்றாக குறிப்பிடுகிறார். இந்தத் தொகுப்பிலிருந்து வேறு எந்த கதையையும் அவர் குறிப்பிட்டு சொல்லவில்லை. எஸ்.ரா.வும் இந்தத் தொகுப்பிலிருந்து எந்த கதையையும் தேர்ந்தெடுக்கவில்லை.

படியுங்கள் என்று சிபாரிசு செய்கிறேன்.

தொகுக்கப்பட்ட பக்கம்: தமிழ் சிறுகதைகள்

தொடர்புடைய பக்கங்கள்:
க.நா.சு.வின் “படித்திருக்கிறீர்களா?”
தி.ஜா. அறிமுகம்
தி. ஜானகிராமன் + சிட்டி எழுதிய “நடந்தாய் வாழி காவேரி” – சாரதா அறிமுகம் செய்கிறார்