Taking of Pelham 123

ஜான் கோடே 1973இல் எழுதிய த்ரில்லர் நாவல். இரண்டு மூன்று முறை திரைப்படமாக வந்திருக்கிறது. என் பதின்ம வயதில் படித்திருக்கிறேன். அன்றும் சரி, இப்போது மீண்டும் ஒரு முறை படித்தபோதும் சரி, இந்த நாவலின் வடிவ கச்சிதம் மனதைக் கவர்ந்தது. விறுவிறுப்பாக எழுதுவது எப்படி என்று ஏதாவது வகுப்பு இருந்தால் அதில் பாடமாக வைக்கலாம்.

நியூ யார்க் நகரத்தில் சப்வேக்கள் – பூமிக்கடியில் செல்லும் ரயில் பாதைகள் நகரத்தின் முக்கிய பகுதி. நகரமே சப்வே இல்லை என்றால் ஸ்தம்பித்துவிடும். ஒரு ரயிலை – முழு ரயில் கூட இல்லை, ஒரே ஒரு பெட்டி, அதில் 15-16 பயணிகளைப் பிடித்து வைத்துக் கொண்டு ஒரு மில்லியன் டாலர்கள் பணம் கொடுக்கவில்லை என்றால் இவர்களைக் கொன்றுவிடுவேன் என்று மிரட்டுகிறார்கள். பூமிக்கடியில் சுரங்கப் பாதையில் ரயில் நிற்கிறது. பணத்தை வாங்கிக் கொண்டு எப்படி தப்பிப்பார்கள்?

குற்றவாளிகள் வெறும் ஸ்டீரியோடைப்கள் – திட்டங்களை மிகவும் கச்சிதமாக செயல்படுத்தும் தலைவன் (ரைடர்). சொல்வதை கேள்வி கேட்காமல் திறமையாக செயல்படுத்தும் ஒரு சிப்பாய் (ஸ்டீவர்). திறமையான திட்டத்தைப் போட்டுக் கொடுக்கும் மூளைக்கார, ஆனால் கோழையானவன். (லாங்மன்). தைரியமும் வீரமும் உள்ள, ஆனால் ஆணைகளை தன் இஷ்டப்படி மட்டுமே செயல்படுத்தும் வெல்கம். இந்த ஸ்டீரியோடைப்களை வைத்தே மிகத் திறமையாக எழுதப்பட்ட நாவல்.

இரண்டு பக்கத்துக்கு ஒரு முறை கடத்தல்காரர்களில் யாராவது, ரயில் பாதையை கண்காணிக்கும் சிக்கலில் மாட்டிக் கொண்டிருக்கும் அதிகாரிகள், பயணிகள், நகரத்தின் மேயர், போலீஸ்காரர்கள் என்று கதை வேறு வேறு கோணங்களில் சொல்லப்படுகிறது. அதுதான் இந்தக் கதையின் விறுவிறுப்புக்கு முக்கியக் காரணம். கடத்தல்காரர்களின் திட்டமும் நடக்கக் கூடியதுதான், புத்திசாலித்தனமானது. நாவலின் denouement-உம் சிறப்பாக அமைக்கப்பட்டிருக்கிறது.

படியுங்கள் என்று பரிந்துரைக்கிறேன்.

தொகுக்கப்பட்ட பக்கம்: த்ரில்லர்கள்

மைக்கேல் கானலியின் ரெனீ பல்லார்ட் த்ரில்லர்கள்

Michael Connelly

கானலியின் புகழ் பெற்ற பாத்திரம் ஹாரி போஷ்தான். மாத்யூ மக்கானகி நடித்து திரைப்படமாக வந்த Lincoln Lawyer திரைப்படத்தினால் மிக்கி ஹாலர் என்ற சீரிஸ் பாத்திரமும் இன்று பிரபலமாக இருக்கிறது. லிங்கன் லாயர் மிகக் கச்சிதமாக கட்டமைக்கப்பட்ட த்ரில்லர். ஆனால் ஹாரி போஷ் பாத்திரத்துக்குத்தான் நாயகத்தன்மை இருக்கிறது. கொலைகாரர்களை – தீய சக்திகளை – தீய சக்தி என்றால் பத்தவில்லை, evil-ஐ அழிப்பதுதான் போஷின் ஸ்வதர்மம். துப்பறிபவர்களுக்கு நம்பகத் தன்மையுடன் ஸ்வதர்மத்தை உருவாக்குவது கஷ்டம். அதனால்தான் முக்கால்வாசி துப்பறியும் கதை எழுதுபவர்கள் இதையெல்லாம் பற்றி கவலைப்படுவதில்லை. ஷெர்லக் ஹோம்ஸ் கூட இருபத்தொன்றாம் நூற்றாண்டில் அதே விழுமியங்களோடு துப்பறிந்தால் கொஞ்சம் செயற்கையாக இருக்கும். ஆனால் அப்படி உருவாக்கிவிட்டால் துப்பறியும் நிபுணர் நாயகனாக மாறிவிடுகிறார். வெகு சிலரே – ஹோம்ஸ், டாஷியல் ஹாம்மெட்டின் சாம் ஸ்பேட், ரேமண்ட் சாண்ட்லரின் ஃபிலிப் மார்லோ, டிக் ஃப்ரான்சிஸின் நாயகர்கள், இந்த ஹாரி போஷ், சாரா பாரட்ஸ்கியின் வி.ஐ. வார்ஷாவ்ஸ்கி – அப்படிப்பட்ட நாயகர்கள்.

ஆனால் இந்தப் பதிவு ஹாரி போஷைப் பற்றியது அல்ல. ஹாரி போஷ் ஒரு துணை கதாபாத்திரமாக வரும் ரெனீ பல்லார்ட் சீரிசைப் பற்றியது. ரெனீக்கும் இன்னும் நாயகத்தன்மை வரவில்லை என்றுதான் சொல்வேன், ஆனால் வருவதற்கான சாத்தியக் கூறுகள் இருக்கின்றன. Not sure that she will turn into a hero(ine), but the process of her evolution into a hero is very interesting.

இந்த சீரிசில் இது வரை மூன்று நாவல்கள் வந்திருக்கின்றன. Late Show (2017), Dark Sacred Night (2018), Night Fire (2019)

ரெனீ முன்னுக்கு வந்து கொண்டிருக்கும் ஒரு போலீஸ் அதிகாரி. அவரது மேலதிகாரி அவருக்கு பாலியல் தொந்தரவு கொடுக்க, இவர் புகார் செய்கிறார். புகாரை நிரூபிக்க முடியவில்லை. ரெனீ முக்கியத்துவம் இல்லாத ஒரு பதவிக்கு தூக்கி அடிக்கப்படுகிறார். இப்போது அவருடைய வேலை ஏறக்குறைய முதலுதவி மாதிரி. இரவில் நடக்கும் குற்றங்களை விசாரித்து முதல் அறிக்கை தருவது. பொழுது விடிந்ததும் அந்தக் குற்றங்களை செய்தது யார் என்று விசாரித்து குற்றவாளிகளுக்கு தண்டனை வாங்கித் தரும் பொறுப்பு பிற அதிகாரிகளுடையது. ரெனீ பகல் வேளைகளில் லாஸ் ஏஞ்சலஸின் கடற்கரையில் ஒரு கூடாரத்தில் தன்னுடைய நாயுடன்தான் வசிக்கிறார். இரவில் அலுவலகத்தில், தனது காரில் வாழ்கிறார்.

Late Show நாவலில் ஒரு நாள் இரவில் பெண் போல வேடமணியும் ஒரு ஆண் விபச்சாரியை யாரோ ஏறக்குறைய உயிர் போகும் வரை அடித்துப் போட்டு போயிருக்கிறார்கள், ரெனீ மருத்துவமனையில் சேர்க்கிறார். அதே இரவில் ஒரு நைட்கிளப்பில் ஒருவன் நாலைந்து பேரை சுட்டுத் தள்ளிவிட்டு தப்பி இருக்கிறான். இரண்டாவது கேசை விசாரிக்கும் உயர் அதிகாரி ரெனீயை பாலியல் தொந்தரவு செய்தவர். அவருக்கு ஒரு டீம் இருக்கிறது, அந்த டீமில் ரெனீயின் முன்னாள் பார்ட்னரும் ஒரு அங்கத்தினர். விபச்சாரியை அடித்தது யார் என்று துப்பறிவது விறுவிறுவென்று போகும் பகுதி; நைட்கிளப் கொலைகள் காட்டுவதோ பார்ட்னர்களுக்குள் உள்ள பந்தத்தை. நன்றாக எழுதப்பட்ட த்ரில்லர்.

Dark Sacred Night சுமார்தான். அதன் சுவாரசியம் ஹாரி போஷ் துணைப்பாத்திரமாக வருவதுதான்.

Night Fire இன்னொரு சிறந்த நாவல். இதிலும் ஹாரி போஷ் ஒரு துணைப்பாத்திரம். ஹாரி போஷின் குரு தன்னுடன் ஒரு கொலையின் ஃபைலை வைத்திருக்கிறார். அவர் இறந்ததும் யார் கொலையாளி என்று ஹாரியும் ரெனீயும் தேடுகிறார்கள். இன்னொரு பக்கம் ஒரு கொலையாளி.

ஒரே ஒரு நாவல் படிக்க வேண்டுமென்றால் Late Show-ஐ பரிந்துரைக்கிறேன். ஆனால் எல்லாமே படிக்கக் கூடிய நாவ்ல்களே.

தொகுக்கப்பட்ட பக்கம்: த்ரில்லர்கள்

துப்பறியும் கதைகள்: சூ க்ராஃப்டன்

க்ராஃப்டன் பிரபல துப்பறியும் கதை எழுத்தாளர். ஆனால் என் கண்ணில் இவரது கதைகளில் சுவாரசியம் குறைவு. முடிச்சு, முடிச்சு அவிழும் விதம் எல்லாம் பிரமாதமாக இருப்பதில்லை. திடீர் திடீரென்று வாழ்க்கையின் mundane விவரங்களைப் பற்றி – சாப்பிட்டது, ஜாகிங் போனது எல்லாம் வரும். குறிப்பிட வேண்டிய கதை என்று எனக்கு எதுவும் தெரியவில்லை, என் கண்ணில் தவிர்க்கப்பட வேண்டியவரே. ஆனால் துப்பறியும் கதைகளை விரும்பிப் படிப்பவர்களுக்கு பிடிக்க நிறைய வாய்ப்புண்டு. “A” is for Alibi என்று ஆரம்பித்து “Y” Is for Yesterday வரை வந்திருக்கிறார். இதோ Z வந்துவிடும், அப்புறம் என்ன செய்வாரோ தெரியவில்லை. “Z” is for Zero என்ற புத்தகத்தோடு இதை முடித்துவிடத் திட்டமிட்டிருந்தாராம், ஆனால் அதை ஆரம்பிப்பதற்கு முன்பே இறந்துவிட்டார். அதனால் பிரச்சினையே இல்லை.

க்ராஃப்டனின் புத்தகங்கள் மிகவும் பிரபலமாக இருந்தாலும் அவர் அவற்றை திரைப்படமாக்க சம்மதிக்கவே இல்லை. இத்தனைக்கும் அவரே பல திரைக்கதைகளை எழுதி இருக்கிறார்.

முதல் புத்தகம் A is for Alibi (1982). 32 வயது துப்பறிபவர் – கின்சி மில்ஹோன் – அறிமுகம் ஆகிறார். கணவனைக் கொன்ற குற்றத்துக்காக ஜெயிலுக்குப் போன நிக்கி பரோலில் வெளியே வருகிறாள். தான் கொல்லவில்லை, யார் கொன்றது என்று கண்டுபிடிக்க கின்சியை அணுகுகிறார். விறுவிறுவென்று போகிறது. எனக்கு ஒரு விஷயம் புரிவதில்லை. எல்லாரும் கின்சியிடம் பேசுகிறார்கள், விவரங்கள் தருகிறார்கள். என்னிடம் யாராவது பேசினால் நான் பேச மறுப்பேன். நான் விதிவிலக்கா, இல்லை க்ராஃப்டன் எடுத்துக் கொள்ளும் literary license-ஆ?

B is for Burglar (1985): எனக்கு பல loose ends தெரிகின்றன. சகோதரியைக் காணவில்லை என் பெவர்லி டான்சிகர் கின்சியை அணுகிறாள். பஸ்ஸில் படிக்கலாம்.

C Is for Corpse (1986) ஓரளவு பரவாயில்லை. பாபி காலஹன் பெரிய விபத்திலிருந்து தப்பித்திருக்கிறான். பல விஷயங்கள் நினைவில்லை. தன்னை யாரோ கொல்ல முயற்சி செய்கிறார்கள் என்று கின்சியை அணுகுகிறான், இரண்டு நாளில் இறந்தும் போகிறான். கின்சி மர்மத்தைத் துப்பறிகிறாள்.

D Is for Deadbeat (1987) டைம் பாஸ் புத்தகம். குடிகார டாகெட் குடித்துவிட்டு காரை ஓட்டும்போது ஐந்து பேர் இறந்துவிடுகிறார்கள், ஜெயிலுக்குப் போகிறான். பரோலில் திரும்பி வரும்போது இறந்தவர்களின் குடும்பத்தைச் சேர்ந்த பள்ளி மாணவன் கெஹனுக்கு நஷ்ட ஈடாக கொஞ்சம் பணம் தர முயற்சிக்கிறான். கெஹன் எங்கே என்று தெரியவில்லை, அதனால் கின்சியை அணுகுகிறான். நாலைந்து நாளில் இறந்தும் போகிறான். கின்சி மர்மத்தைத் துப்பறிகிறாள்.

Kinsey and Me (2013): பல சிறுகதைகளின் தொகுப்பு. எதுவும் என்னைக் கவரவில்லை.

எனக்கு ஒரு அசட்டுப் பழக்கம் உண்டு. ஒரு சீரிசை ஆரம்பித்துவிட்டால் முழுவதுமாக படித்துவிட வேண்டும். இந்த வருஷமாவது இதை நிறுத்த வேண்டும் என்று நினைத்துக் கொண்டிருந்தேன். க்ராஃப்டனிலிருந்தே ஆரம்பிக்கிறேன்! இதற்கு மேல் எதுவும் படிப்பதாக இல்லை. துப்பறியும் கதை விரும்பிகள் தவிர மற்றவர்கள் தவிர்த்துவிடலாம். ஒரே ஒரு புத்தகம் படிக்க வேண்டுமென்றால் A is for Alibi படித்துப் பாருங்கள்!

தொகுக்கப்பட்ட பக்கம்: த்ரில்லர்கள்

பிரபல திரைப்படங்களின் கதாசிரியர் ப்ரையன் கார்ஃபீல்ட்

ப்ரையன் கார்ஃபீல்ட் (Brian Garfield) எனக்குத் திரைப்படங்களின் மூலம்தான் அறிமுகம் ஆனார். Hopscotch மற்றும் Death Wish படங்களை நான் ஒரு காலத்தில் விரும்பிப் பார்த்திருக்கிறேன். பிற்காலத்தில் அந்தப் புத்தகங்களைத் தேடி எடுத்துப் படிக்கவும் செய்தேன். சுமாரான த்ரில்லர் எழுத்தாளர் என்றுதான் சொல்ல வேண்டும். ஆனால் திரைப்படமாக ஆக்கத் தேவையான டென்ஷன் மிகுந்த காட்சிகள், சிம்பிளான கதை ஓட்டம் இரண்டும் இருக்கிறது.

ஒரே ஒரு புத்தகம் படிக்க வேண்டுமென்றால் நான் பரிந்துரைப்பது Hopscotch (1975). நல்ல மசாலா புத்தகம். மைல்ஸ் கெண்டிக் சிஐஏவில் வேலை பார்த்தவன். இப்போது அவனுக்குப் பிடித்த மாதிரி களவேலை இல்லை, ஃபைல் பார் என்கிறார்கள். போரடிக்கிறது. திடீரென்று சிஐஏ, கேஜிபி உள்ளிட்ட ஒற்று வேலை நிறுவனங்கள் பற்றி ஒரு expose எழுதத் துவங்குகிறான். அதை சிஐஏவுக்கே அத்தியாயம் அத்தியாயமாக அனுப்புகிறான். அவனை இப்போது சிஐஏ துரத்த, கேஜிபியும் துரத்த ஜாலியாக திருடன் போலீஸ் விளையாட்டு மாதிரி விளையாடுகிறான்!

திரைப்படம் இன்றும் பார்க்கக் கூடியதே என்றுதான் கருதுகிறேன். மெல்லிய நகைச்சுவை. வால்டர் மத்தா மைல்ஸ் கெண்டிகாக நன்றாக நடித்திருப்பார்.

Deathwish (1972) Vigilante தீம். மனைவி கொல்லப்பட்டு மகளுக்கு பைத்தியம் பிடிக்கும் அளவுக்கு சில கிரிமினல்கள் நம் ஹீரோவின் வீடு புகுந்து தாக்குகிறார்கள். கிறுக்குப் பிடித்தாற்போல அலையும் ஹீரோ கடைசியில் திருடர்கள், சின்ன சின்னக் குற்றம் செய்பவர்களைத் தேடிப் பிடித்து வேட்டை ஆடுகிறார். சார்லஸ் ப்ரான்சன் நடித்து திரைப்படமாக வந்து நன்றாக ஓடிற்று. ப்ரூஸ் வில்லிஸ் நடித்து இன்னொரு வடிவமும் இரண்டு வருஷங்களுக்கு முன் வெளியாயிற்று.

Death Sentence (1975) Deathwish-இன் தொடர்ச்சி. இந்த முறை சிகாகோவில் வேட்டை ஆடும் நம் ஹீரோவைப் பார்த்து copycats கிளம்பிவிடுகிறார்கள்.

Recoil (1977) சுவாரசியமான கரு. மாஃபியா தலைவனுக்கு எதிராக சாட்சி சொல்லி அவனை சிறைக்கு அனுப்பும் மெர்லே. பழிவாங்கிவிடுவார்கள் என்று பயந்து பேரை மாற்றி ஊரை மாற்றி வாழ்ந்து கொண்டிருக்கிறான். சிறையிலிருந்து வெளிவந்து வில்லன் அவனை கண்டுபிடித்துவிடுகிறான், கொல்ல முயற்சிக்கிறான். எப்படி தப்பிப்பது? நிறைய பேசிக் கொண்டே இருக்கிறார்கள் என்றாலும் படிக்கக் கூடிய த்ரில்லர்.

Line of Succession (1972) போன்றவை டைம் பாஸ் புத்தகங்கள்.

தொகுக்கப்பட்ட பக்கம்: த்ரில்லர்கள்

தொடர்புள்ள சுட்டிகள்:
ப்ரையன் கார்ஃபீல்டின் தளம்
விக்கி குறிப்பு
IMDB தளத்தில் Hopscotch, Death Wish

மார்டின் க்ரஸ் ஸ்மித்: ஆர்கடி ரென்கோ நாவல்கள் சீரிஸ்

இன்று என் பிறந்த நாள். என்ன வயது என்று சொல்லப் போவதில்லை. பிறந்த நாள் அன்று ஏதாவது தத்துவம், பொன்மொழி எதையாவது உதிர்க்க வேண்டும். எங்கே போவது?

ஆர்கடி ரென்கோ நாவல்கள் எனக்கு பிடித்தமானவை. இந்த சீரிசில் சமீபத்தில் வெளிவந்த ரென்கோ நாவலான Siberian Dilemma (2019) நாவலைப் படித்தேன். சோகம் என்னவென்றால் நாவல் பெரிதாக சுகப்படவில்லை. ஆனால் Dilemma-வின் விளக்கம் மிக நன்றாக இருந்தது, வாழ்க்கைக்கு சரியான ஒன்று. கைகொடுத்த மார்டின் க்ரஸ் ஸ்மித் வாழ்க!

என் paraphrasing:

சைபீரியாவின் உறைந்த ஏரிகளில் ஐஸ் மீது நடந்து மீனவர்கள் மீன் பிடிக்க செல்வதுண்டு. சில சமயம் ஐஸ் உடைந்துவிடும், தண்ணீரில் விழுந்துவிடுவார்கள். தண்ணீரிலிருந்து வெளியே வந்தால் மிஞ்சி மிஞ்சிப் போனால் ஒரு நிமிஷத்திற்குள்ளாக உடல் உறைந்துவிடும், thermal shock-இல் இறந்துவிடுவார்கள். தண்ணீருக்குள் இருந்தால் ஐந்து நிமிஷத்தில் hypothermia-வில் இறப்பார்கள். எது பெட்டர்?

The question really is this: is it better to live with the status quo even if the situation is horrible, or is it better to try something, howsoever hopeless the situation is? In my younger days, I would have definitely said given that both situations are hopeless, choose the one that gives you a longer time. I now think that action, howsoever hopeless it is, is a much better option.

அதாவது வெளியே வருவதுதான் பெட்டர். ஏதாவது நடக்கலாம் ஒரு சின்ன வாய்ப்பாவது இருக்கிறது. ஒரு வேளை அவர்கள் ஓடினாலோ அல்லது வேறுவிதமாக உடலை இயக்கினாலோ அல்லது மருத்துவ வசதிகள் இருந்தாலோ பிழைக்க ஒரு minuscule வாய்ப்பிருக்கிறது. தண்ணீருக்குள் இருந்தால் மரணத்தை தடுக்க எந்த வாய்ப்புமில்லை.

நீங்கள் என்ன நினைக்கிறீர்கள்?

ஒரிஜினல் பதிவு கீழே…

Martin Cruz Smith உருவாக்கிய ஆர்கடி ரென்கோ (Arkady Renko) எனக்கு பிடித்த காரக்டர்களில் ஒருவர். கம்யூனிஸ்ட் ரஷியாவில் உயர்மட்ட ஜெனரலின் மகன். சீரிஸ் ஆரம்பிக்கும்போது அவர் மாஸ்கோ போலீசில் முக்கிய அதிகாரி. நேர்மையானவர், யாருக்கும் வளைந்து கொடுக்கமாட்டார். வளைந்து கொடுப்பது என்று இல்லை, வேண்டுமென்றே அதிகாரத்தில் உள்ளவர்களை தான் துப்பறியும் கேசுக்காக எதிர்த்துக் கொள்வார். அதாவது ஜெயலலிதா மேல் கேஸ், இவர் துப்பறிகிறார் என்றால் சரியான சமயத்தில் வேறு பக்கம் திரும்பிக் கொள்ள மாட்டார், வேண்டுமென்றே குடைச்சல் கொடுப்பார்.

ஆர்க்கடியின் பாத்திரப் படைப்பு சில cliche-க்கள் உள்ளது. இருந்தாலும் ரசிக்கக் கூடியது. அவருக்கு ரஷியா மேல் இருக்கும் உண்மையான பற்று, அவருடைய உயர்ந்த மனிதத்தன்மை (noble nature), முக்கியமாக விடாக்கண்டனாக இருப்பது இந்தக் கதைகளை உயர்த்துகிறது. ஒரே ஒரு கதை படிக்க வேண்டுமென்றால் போலார் ஸ்டார் கதையை சிபாரிசு செய்வேன். இரண்டு கதைகள் என்றால் கார்க்கி பார்க் மற்றும் போலார் ஸ்டார்.

இந்த சீரிஸில் வந்த நாவல்களைப் பற்றி கீழே.

Gorky Park, 1981: ஆர்க்கடி ஏற்கனவே ஒரு கேஜிபி கர்னலை முறைத்துக் கொண்டிருக்கிறார். இப்போது மாஸ்கோவில் நல்ல பனிக்காலத்தில் ஒரு பார்க்கில் மூன்று பிணங்கள். ஏதோ கேஜிபியோடு தொடர்பு இருப்பது தெரிகிறது. விடாக்கண்டன் போலத் துப்பறிகிறார். திருமணம் முறிகிறது. காதல் ஏற்படுகிறது. ஒரு powerful அமெரிக்கனை எதிர்க்கிறார். அவரது திமிர்+நேர்மை அவருக்கு எதிரியாக இருந்த கேஜிபி கர்னலையே அவருக்காக வாதிட வைக்கிறது. நல்ல த்ரில்லர். வில்லியம் ஹர்ட் நடித்து திரைப்படமாகவும் வந்தது.

Polar Star, 1989: எனக்கு மிகவும் பிடித்த நாவல் இதுதான். ரென்கோவை போலீசிலிருந்து தூக்கிவிட்டார்கள். அவர் இப்போது ஆர்க்டிக் கடலில் மீன் பிடிக்கும் கப்பல் ஒன்றில் மீனை சுத்தம் செய்யும் வேலை. கப்பலில் ஒரு கொலை, ரென்கோ துப்பறிய வேண்டி இருக்கிறது. மனிதர் கலக்குகிறார்! கொஞ்சம் கூட அதிகாரமே இல்லாத நிலை, ஆனால் எப்போதும் தான் கண்ட்ரோலில் இருப்பது போலவே நடந்து கொள்கிறார்.

Red Square, 1992: சோவியத் யூனியன் கவிழ்ந்துவிட்டது. ஆர்க்கடிக்கு மீண்டும் மாஸ்கோ போலீசில் வேலை. ஒரு கறுப்பு மார்க்கெட் ஆளைத் தேடும்போது மலேவிச் வரைந்த ரெட் ஸ்க்வேர் என்ற ஓவியத்தைப் பற்றி க்ளூ கிடைக்கிறது. தன் காதலியோடு இணைகிறார். ஆனால் ட்ராஜடியாக கதை முடிகிறது.

Havana Bay, 1999: இந்தக் கதை நடப்பது க்யூபாவில். பெரிதாக விவரிக்க முடியவில்லை, படித்துக் கொள்ளுங்கள்.

Wolves Eat Dogs, 2004: இந்தக் கதை நடப்பது அணு உலை வெடித்த செர்னோபிலில். ரஷியாவின் புதிய பில்லியனர்களில் ஒருவன் தற்கொலை செய்து கொள்கிறான். அதற்கான விடை செர்னோபில் அணு உலை விபத்தில் இருக்கிறது.

Stalin’s Ghost, 2005: ஸ்டாலின் ஆவி மாஸ்கோ ரயில் நிலையங்களில் தோன்றுகிறது! துப்பறியப் போகும் ஆர்க்டி செசன்யா போரில் சண்டை போட்டவர்கள், பல கொலைகள் எல்லாவற்றுக்கும் உள்ள தொடர்பைக் கண்டுபிடிக்கிறார்.

3 Stations, 2010: சுமார்தான். ஆர்கடிக்கு பேருக்கு மட்டும் மாஸ்கோ போலீசில் வேலை. அவரது மேலதிகாரி எப்படி இந்த ஆளை வேலையை விட்டு தூக்கலாம் என்று பார்க்கிறார். ஒரு 15 வயதுப் பெண், விபசார விடுதியிலிருந்து தன் 3 வார குழந்தையோடு தப்பி வருகிறாள். மாஸ்கோவுக்கு வரும்போது அவள் குழந்தை திருட்டுப் போய்விடுகிறது. அவளுக்கு துணையாக ஜென்யா. குரூரமான ஒரு கொலை நடந்திருக்கிறது. கேசை மூடுங்கப்பா என்று எல்லாரும் சொன்னாலும் ஆர்கடி அதை விடாமல் துப்பறிகிறார். ஒரு பில்லியனர் சூதாட்ட விடுதி முதலாளி தர்ம ஸ்தாபனம் என்று சொல்லி பணத்தை திருடிக் கொண்டிருக்கிறான். ஆர்கடி எல்லாவற்றையும் தீர்த்து வைக்கிறார்.

Tatiana, 2013:சுமார்தான். இந்த முறை மாஃபியா கும்பல் தலைவன் இறக்கிறான்; ஒரு மொழிபெயர்ப்பாளன் இறக்கிறான்; ஒரு crusading பத்திரிகையாளர் “இறக்கிறாள்”. எல்லாவற்றுக்கும் என்ன தொடர்பு என்று ஆர்கடி கண்டுபிடிக்கிறார்.

---

தொகுக்கப்பட்டம் பக்கம்: த்ரில்லர்கள்

லீ சைல்டின் ஜாக் ரீச்சர் நாவல்கள்

சமீபத்தில் வெளிவந்த Blue Moon புத்தகத்தைப் படித்ததால் மீள்பதித்திருக்கிறேன்.

Blue Moon ஜாலியான மசாலா கதை. ரொம்ப லாஜிக் எல்லாம் பார்க்கக் கூடாது. பயணத்தில் படிக்க ஏற்றது. வழக்கம் போல தனி மனிதனான ஜாக் ரீச்சர் ஊரில் போட்டி போடும் இரண்டு மாஃபியா கும்பல்களையும் அழிக்கிறான். க்ளிண்ட் ஈஸ்ட்வுட் நடித்த For a Few Dollars More திரைப்படத்தை கொஞ்சம் நினைவுபடுத்தியது. விஜய், அஜித் எல்லாம் இதை மூலக்கதையாக வைத்து படம் எடுக்கலாம், கொஞ்சம் பெட்டராக இருக்கும்.

லீ சைல்ட் (Lee Child) ஒரு த்ரில்லர் எழுத்தாளர். அவர் கதைகளின் ஹீரோ ஜாக் ரீச்சர் (Jack Reacher). ஜாக் ஒரு எக்சென்ட்ரிக். முன்னாள் ராணுவ வீரன். கை சண்டை, துப்பாக்கி சுடுதல் ஆகியவற்றில் எக்ஸ்பர்ட். ஜாக் எந்த ஊரிலும் வாழ்வதில்லை, அட்ரசே கிடையாது. கால் போன போக்கில் போவான். போகிற இடத்தில் எல்லாம் பிரச்சினை வரும், துப்பறிந்து, சண்டை போட்டு தீர்ப்பான். டைம் பாஸ் நாவல்கள், ப்ளேனில் படிக்க ஏற்றவை.

ரீச்சரை ஒரு விதத்தில் வெஸ்டர்ன் ஹீரோ என்று சொல்லலாம். எங்கிருந்தோ வரும் ஒருவன் ஊரில் உள்ள குற்றச் சூழ்நிலையை ஒழிக்கும் கருவைத்தான் மீண்டும் மீண்டும் எழுதுகிறார். எதுவும் நினைவு வைத்துக் கொள்ள வேண்டிய கதை இல்லை. டிபிகல், ஆனால் கொஞ்சம் புத்திசாலித்தனமான, த்ரில்லர் எழுத்து. Pulp fiction. ஆனால் அந்த எங்கிருந்தோ வரும் வெஸ்டர்ன் ஹீரோ இமேஜில் ஒரு கவர்ச்சி இருக்கிறது.

இது வரை 16 24 நாவல்கள் வந்திருக்கின்றன.

1. Killing Floor, 1997
2. Die Trying, 1998
3. Tripwire, 1999
4. Running Blind, 2000
5. Echo Burning, 2001
6. Without Fail, 2002
7. Persuader, 2003
8. The Enemy, 2004
9. One Shot, 2005
10. The Hard Way, 2006
11. Bad Luck and Trouble, 2007
12. Nothing to Lose, 2008
13. Gone Tomorrow, 2009
14. 61 Hours, 2010
15. Worth Dying For, 2010
16. Affair, 2011
17. A Wanted Man, 2012
18. Never Go Back, 2013
19. Personal, 2014
20. Make Me, 2015
21. Night School, 2016
22. No Middle Name, 2017
23. Midnight Line, 2017
24. Past Tense, 2018
25. Blue Moon, 2019
26. Sentinel, 2020

ஒவ்வொரு கதைக்கும் கதைச்சுருக்கம் எழுதும் அளவுக்கு முக்கியமானவை இல்லை. ஒரே ஒரு கதை படிக்க வேண்டுமென்றால் One Shot என்ற கதையை பரிந்துரைப்பேன். ஐந்து கொலைகளில் குற்றம் சாட்டப்பட்டவன் மீண்டும் மீண்டும் சொல்வது – “நான் குற்றமற்றவன், Get me Jack Reacher” ஆனால் ரீச்சர் அவன் குற்றவாளி என்று நினைக்கிறான். என்னாகிறது என்பதுதான் கதை. இது திரைப்படமாகவும் வரப்போகிறது வந்துவிட்டது, டாம் க்ருய்ஸ் நடிக்கப் போகிறார் நடித்திருக்கிறார்.

Killing Floor என்ற கதையையும் படிக்கலாம். இதுதான் முதல் நாவல். தற்செயலாக ஒரு சின்ன ஊரில் ரீச்சர் இறங்குகிறான். Of course, ஊரில் பெரிய சதி நடந்து கொண்டிருக்கிறது. ரீச்சர் கொலை செய்துவிட்டான் என்று கைது செய்யப்படுகிறான். ஜெயிலில் நடக்கும் சண்டைக்காட்சிகள் திரில்லிங் ஆக இருக்கும். வெளியே வந்த பிறகு அவனுக்கு இறந்தவன் தன் அண்ணன் என்று தெரிகிறது. பிறகு வழக்கம் போல சண்டை, எல்லா வில்லனையும் ஒழித்துக் கட்டுகிறான்.

சிறந்த வில்லன் – ஹுக் ஹோபி – வருவது Tripwire என்ற கதையில். ஹோபி ரீச்சரையும், ரீச்சரின் முன்னாள் பாஸ் கார்பரின் மகள் ஜோடியையும் கொல்ல முயற்சி செய்கிறான்.

சமீபத்திய கதையான Sentinel-ஐ தன் தம்பி ஆண்ட்ரூ சைல்டோடு இணைந்து எழுதி இருக்கிறார்.

தொகுக்கப்பட்ட பக்கம்: த்ரில்லர்கள்

தொடர்புடைய சுட்டி: லீ சைல்டின் தளம்

ஸ்டேய்க் லார்சன் எழுதிய “Girl with a Dragon Tattoo” சீரிஸ்

(மீள்பதிவு)

லிஸ்பெத் ஸலாண்டர் சீரிசில் சமீபத்திய புத்தகமான Girl Who Lived Twice (2019)-ஐ சமீபத்தில் படித்ததால் இதை மீள்பதிக்கிறேன். முதல் புத்தகமான Girl with a Dragon Tattoo அளவுக்கு வராது என்றாலும் படிக்கக் கூடிய பொழுதுபோக்கு புத்தகம்.

ஸ்லாண்டரின் ‘திறமைகள்’ – நினைத்தால் யாருடைய கம்ப்யூட்டரிலும் நுழைய முடிகிறது, கண்காணிப்பு காமிராக்களை அணைக்க முடிகிறது இத்யாதி – பல சமயம் என்னடா இது ரொம்ப ஓவராக இருக்கிறதே இன்று நினைக்க வைப்பதுதான் இந்த சீரிசில் எனக்கு கொஞ்சம் பிரச்சினை. இருந்தாலும் ஷெர்பா ஒருவரை உள்ளே கொண்டு வந்தது, அந்த ஷெர்பாவின் பின்னணி ஓரளவு பிடித்திருந்தது.

முந்தைய பதிவிலிருந்து:

ரொம்ப நாளைக்கப்புறம் ஒரு நல்ல த்ரில்லரைப் படித்தேன்.

ஸ்டேய்க் லார்சன் (Steig Larsson) எழுதிய புத்தகம் Girl with the Dragon Tattoo (2005). இது ஒரு trilogy-யின் முதல் பகுதி. Girl Who Played with Fire, The Girl Who Kicked the Hornets’ Nest இரண்டும் இந்த சீரிஸின் அடுத்தடுத்த நாவல்கள். லார்சன் ஸ்வீடன்காரர். இப்போது உயிரோடு இல்லை. ஸ்வீடிஷ் மொழியில் எழுதிய இந்த புத்தகங்கள் இப்போது மொழிபெயர்க்கப்பட்டு சக்கைப்போடு போட்டுக்கொண்டிருக்கின்றன.

Prologue-ஏ ஈர்க்கிறது. வருஷாவருஷம் ஒரு வயதானவருக்கும் ஒரு வயதான போலீஸ்காரருக்கும் வயதானவரின் பிறந்த நாளன்று ஃபிரேம் செய்யப்பட ஒரு பூ தபாலில் வருகிறது. அது ஒரு குற்றவாளி யாரென்று கண்டுபிடிக்க முடியாமல் போன கேஸ் சம்பந்தப்பட்டது. நாற்பத்து சொச்சம் வருஷமாக வருகிறது. யார் அனுப்புவது?

மைக்கேல் ப்ளோம்க்விஸ்ட் ஒரு பத்திரிகையாளர். குறிப்பாக கம்பெனிகள், பொருளாதாரம் பற்றி எழுதுபவர். மில்லனியம் என்ற பத்திரிகையில் அவருக்கும் கொஞ்சம் பங்குகள் இருக்கின்றன. கதை அவர் மேல் போடப்பட்ட அவதூறு வழக்கில் அவருக்கு ஜெயில் தண்டனை வழங்கப்படுவதோடு ஆரம்பிக்கிறது. கேஸ் போட்ட வென்னர்ஸ்ட்ராம் பில்லியனர். மில்லனியம் பத்திரிகையையே ஒடுக்க முயற்சிக்கிறார். பத்திரிகையிலிருந்து கொஞ்சம் விலகி இருப்பது நல்லது என்று நினைத்துக்கொண்டிருக்கும்போது வாங்கர் குடும்பத்தின் மூத்தவரான ஹென்றிக் வாங்கர் தன் குடும்பத்தில் ஒரு சோக சம்பவத்தை – அவருடைய அண்ணனின் பேத்தியான ஹாரியட் நாற்பத்து சொச்சம் வருஷங்களுக்கு முன்னால் காணாமல் போனாள் – துப்பறிய வா என்று மைக்கேலை கூப்பிடுகிறார். மைக்கேல் தயங்கினாலும், ஹென்றிக் பணம்+வென்னர்ஸ்ட்ராம் பற்றிய துப்பு தருகிறேன், நீ கண்டுபிடிப்பாய் என்று எனக்கு நம்பிக்கை இல்லைதான், இதை ஒரு கடைசி முயற்சியாகத்தான் செய்கிறேன் என்று சொல்லி மைக்கேலை ஏற்றுக் கொள்ள வைக்கிறார். வாங்கர் குடும்பம் ஒரு காலத்தில் பெரிய பிசினஸ் குடும்பம், இப்போது கொஞ்சம் கஷ்டத்தில் இருக்கிறது.

மைக்கேலுக்கு உதவியாக லிஸ்பெத் சலாண்டர் என்று பெண்ணும் – இவள்தான் டிராகனை பச்சை குத்திய பெண் – சேர்ந்துகொள்கிறாள். லிஸ்பெத் ஒரு கம்ப்யூட்டர் ஜீனியஸ் (ஹாக்கர்). சமூகத்தில் பழகக் கூடியவள் இல்லை. வாங்கர் குடும்பம் ஒரு தீவில் வாழ்கிறது. ஹாரியட் காணாமல் போன அன்று தீவுக்கு வெளியே போக இருக்கும் பாலத்தில் பெரிய விபத்து. தீவில் இருக்கும் யாரோதான் ஹாரியட்டை கொன்று உடலை மறைத்துவிட்டார்கள் என்று ஹென்றிக் சந்தேகப்படுகிறார். ஹாரியட் என்ன ஆனாள், வாங்கர் குடும்பத்தின் ரகசியம் என்ன, வென்னர்ஸ்ட்ராமை கணக்கு தீர்க்க முடிந்ததா என்பதை வெள்ளித்திரையில் காண்க!

கதையின் பெரிய பலம் லிஸ்பெத் சலாண்டர் பாத்திரம். லிஸ்பெத்தை பாலியல் வன்முறை செய்பவரை லிஸ்பெத் கையாளும் சீன் திருப்தியாக இருந்தது!

சுவாரசியமான புத்தகம். பாதி புத்தகம் வரை பில்டப்தான். திடீரென்று பார்க்கிறேன், ஒன்றுமே நடக்கவில்லை, பாதி புத்தகம் முடிந்துவிட்டது. ஆனால் அப்படி ஒன்றுமே நடக்கவில்லை என்பது கூட தெரியாமல் கதையில் மூழ்கி இருக்கிறேன்!

கதையின் வீக்னஸ் என்று பார்த்தால் அது லிஸ்பெத் செய்யும் கம்ப்யூட்டர் சாகசங்கள்தான். லிஸ்பெத் செய்யும் எல்லாமே plausible-தான். ஆனால் டூ மச் சேஸ்தாரண்டி! இன்னும் கொஞ்சம் திறமையாக எடிட் செய்திருந்தால் கதையின் நீளத்தை குறைத்திருக்கலாம்.

2010-இன் நூறு சிறந்த புத்தகங்களில் ஒன்றாக இதை நியூ யார்க் டைம்ஸ் தேர்ந்தெடுத்திருக்கிறது. இன்னும் ஒரு வருஷத்தில் திரைப்படமாகவும் வருகிறதாம். திரைப்படம் வந்துவிட்டதாம். (ஜடாயுவுக்கு நன்றி!)

படியுங்கள் என்று சிபாரிசு செய்கிறேன்.

அடுத்த இரண்டு புத்தகங்களும் – Girl Who Played with Fire (2006), The Girl Who Kicked the Hornets’ Nest (2007) – சுவாரசியமானவைதான், ஆனால் அவை சலாண்டரின் வாழ்க்கையைப் பற்றி. சலாண்டரின் அப்பா ஒரு கொடுமைக்காரன், பனிரண்டு வயதில் வேறு வழி இல்லாமல் சலாண்டர் அவனை தாக்குகிறாள். அதற்காக பைத்தியக்கார ஆஸ்பத்திரியில் அடைக்கப்படுகிறாள். அவள் நார்மல் இல்லை, அவளுக்கு எப்போதும் ஒரு கார்டியன் வேண்டும் என்று ஸ்வீடனின் சட்டம் தீர்மானிக்கிறது. சலாண்டர் எப்படி சாதாரண வாழ்க்கைக்கு திரும்புகிறாள், எப்படி பழி வாங்குகிறாள், அவள் அப்பாவின் வாழ்க்கை மர்மம் என்ன என்று போகின்றன. டாக்டர் டெலிபோரியனை கோர்ட்டில் விசாரிக்கும் காட்சி ரசிக்கும்படி இருந்தது.

இப்போது டேவிட் லாகர்க்ரான்ட்ஸ் இதன் தொடர்ச்சியாக 3 புத்தகங்களை – Girl in the Spider’s Web (2015), Girl Who Takes an Eye for an Eye (2017), Girl Who Lived Twice (2019) – எழுதி இருக்கிறார். எதுவும் முதல் புத்தகம் அளவுக்கு வரவில்லைதான் என்றாலும் படிக்கக் கூடிய பொழுதுபோக்கு நாவல்கள்.

தொடர்புடைய சுட்டி:
சொல்வனத்தில் இன்னும் விலாவாரியான ஒரு அலசல் (ஜடாயுவுக்கு நன்றி!)

டிக் ஃபிரான்சிஸின் மாஸ்டர்பீஸ் த்ரில்லர் – “Forfeit”

(மீள்பதிவு)

டிக் ஃபிரான்சிஸ் எனக்குப் பிடித்த திரில்லர் எழுத்தாளர்களில் ஒருவர். முன்னாள் குதிரைப் பந்தய ஜாக்கி. எல்லா நாவல்களும் குதிரைப் பந்தய பின்புலம் உடையவை. அவருடைய நாயகர்கள் எல்லோரும் ஒரே அச்சில் வார்த்தவர்கள். strong ethical core உடையவர்கள். ப்ராக்டிகல் ஆனவர்கள். எதிரிகளைப் பழி வாங்குவதை விட பிரச்சினைகளைத் தீர்ப்பதில் அதிக ஆர்வம் உடையவர்கள். ஒரு ஆறேழு நாவல்களாவது எனக்குப் பிடித்தவை. (சொதப்பியும் இருக்கிறார்.)

அவருடைய வேறு சில நாவல்களைப் பற்றி முன்னாலும் எழுதி இருக்கிறேன். ஆனால் எனக்கு மிகவும் பிடித்த நாவல் இதுதான். ஒரே ஒரு டிக் ஃபிரான்சிஸ் புத்தகம் படிக்க வேண்டுமென்றால் இதைத்தான் பரிந்துரைப்பேன்.

கதையின் ஆரம்பக் காட்சியில் ஒரு பத்திரிகையாளர் – பெர்ட் செகாவ் – குடிபோதையில் இருக்கிறார், நாயகனும் பத்திரிகையாளனும் ஆன ஜேம்ஸ் டைரோனிடம் உன் எழுத்தை விற்காதே என்று அறிவுரை சொல்கிறார். சிறிது நேரத்துக்குப் பிறகு செகாவ் ஒரு உயரமான கட்டிடத்திலிருந்து கீழே விழுந்து இறந்து போகிறார். டைரோன் ஒரு முக்கியமான ரேஸ் பற்றி ஒரு general interest கட்டுரை எழுதிக் கொண்டிருக்கிறார். அந்த ரேசில் பங்கு பெறும் இரண்டாம் நிலை குதிரைகளைப் பற்றி எழுதுகிறார். அதற்காக பழைய ரேஸ் முடிவுகளைப் புரட்டும்போது செகாவ் பரிந்துரைக்கும் குதிரைகள் அடிக்கடி ரேசிலிருந்து விலகிவிடுகின்றன என்று டைரோன் புரிந்து கொள்கிறார். சதி நடக்கிறது என்று பத்திரிகையில் எழுதுகிறார், இந்த ரேசில் பங்கு பெறும் குதிரைகளைப் பாதுகாக்க முயற்சி எடுக்கிறார். என்ன சதி என்று கண்டுபிடிப்பதுதான் கதை.

டைரோனின் மனைவி போலியோவால் பாதிக்கப்பட்டிருக்கிறார். முகத்துக்குக் கீழே அவருக்கு எதுவும் சரியாக செயல்படுவதில்லை. iron lung என்று சொல்லப்படும் கருவி மூலம்தான் சுவாசமே. மனைவிக்கு எப்போதும் உள்ளூர பயம்; எப்போது தன் சுமையின் பாரம் தாங்காமல் டைரோன் தன்னைக் கை கழுவிவிடுவாரோ என்று. டைரோனோ மனைவியைப் பார்த்துக் கொள்வதை தான் வழுவ முடியாத கடமையாக நினைக்கிறார். வில்லன்களுக்கு blackmail செய்ய அருமையான வாய்ப்பு இல்லையா? செய்கிறார்கள். அந்தக் காட்சிதான் கதையின் உச்சக்கட்டம்.

டைரோன்-மனைவி உறவு, டைரோனின் “கள்ளக் காதல்”, டைரோனின் மன உறுதி ஆகியவைதான் இந்த நாவலை உயர்த்துகின்றன. ஒரே ஒரு டிக் ஃபிரான்சிஸ் நாவல் படிக்க வேண்டுமென்றால் இதைத்தான் சிபாரிசு செய்வேன்.

1968-ஆம் ஆண்டு வெளி வந்த நாவல். துப்பறியும் நாவல்களின் ஆஸ்கார் ஆன எட்கர் விருது பெற்றது.

தொடர்புடைய சுட்டிகள்:
டிக் ஃபிரான்சிசின் நாவல்களைப் பற்றிய முந்தைய பதிவுகள் – நெர்வ், என்கொயரி
டிக் ஃபிரான்சிசின் தளம்

பில் க்ளிண்டன் எழுதிய த்ரில்லர்

President is Missing (2018) என்ற த்ரில்லரை முன்னாள் அமெரிக்க ஜனாதிபதி பில் க்ளிண்டன் எழுதி இருக்கிறார். பில் க்ளிண்டன் எழுதி இருக்கிறார் என்று சொல்வது உயர்வு நவிற்சி அணிதான். அவர் ஜேம்ஸ் பாட்டர்சன் என்ற பிரபல் த்ரில்லர் எழுத்தாளரோடு சேர்ந்து இதை எழுதி இருக்கிறார். அவரது பங்களிப்பு என்பது அரசியல், நிர்வாக பின்புலத்தை எப்படி கதைப்பின்னலோடு சேர்ப்பது என்பதாகத்தான் இருக்க வேண்டும். கடைசியில் வரும் ஒரு உரையை அவரே எழுதி இருக்கிறார் என்று தோன்றுகிறது.

பிரச்சினை என்னவென்றால் இந்தப் புத்தகத்தை ஜேம்ஸ் பாட்டர்சன் எழுதி இருக்கிறார் என்று சொல்வதும் உயர்வு நவிற்சி அணிதான். பாட்டர்சன் கதைப் பின்னலை சொல்லிவிடுவாராம், சில பல எழுத்தாளர்கள் கதையை டெவலப் செய்து எழுதுவார்களாம். இருந்தாலும் ஜேம்ஸ் பாட்டர்சன் பேர் போட்டால்தான் புத்தகம் விற்கும். பில் க்ளிண்டன் பேரைப் போட்டால் இன்னும் நன்றாக விற்கும் என்று அவர் பேரில் புத்தகம் வெளிவந்திருக்கிறது.

புத்தகம் பஸ்ஸில் படித்துவிட்டு தூக்கிப்போட வேண்டிய சாதாரண வணிக நாவலே. பக்கத்துக்கு பக்கம் திடுக்கிடும் திருப்பங்கள். கம்ப்யூட்டர் வைரஸ் தாக்கி அமெரிக்கப் பொருளாதாரத்தை அழிக்கப் போகிறது. அதற்காக ஜனாதிபதியே கோதாவில் இறங்கி தனியாகச் சென்று ஹாக்கர்களை சந்தித்து… நடுவில் ஒரு கொலைகாரி வேறு இந்த ஹாக்கர்களை கொல்ல முயற்சிக்கிறாள். துரோகி யார் என்று ஜனாதிபதியே கண்டுபிடிக்கிறார்.

இந்தப் புத்தகத்துக்கு curiosity value மட்டுமே. நல்ல த்ரில்லர் இல்லை. உங்களுக்கும் என்னதான் இருக்கிறது என்று மனம் குறுகுறுத்தால் மட்டுமே படித்துப் பாருங்கள்.

தொகுக்கப்பட்ட பக்கம்: த்ரில்லர்கள்

தொடர்புடைய சுட்டி: ஜேம்ஸ் பாட்டர்சன் எழுதிய இன்னொரு த்ரில்லர்

போப்பாக ஒரு திருநங்கை – ராபர்ட் ஹாரிசின் ‘Conclave’

சாதாரணமாக spoiler இல்லாமல் புத்தக அறிமுகம் எழுத வேண்டும் என்றுதான் முயற்சிப்பேன். இந்த முறை புத்தகம் கிளப்பிய எண்ணங்களைப் பற்றி எழுத விரும்புகிறேன், அது spoiler இல்லாமல் முடியாது.

ஹாரிஸ் எழுதிய சிசரோ trilogy-க்கு நான் பெரிய ரசிகன். புதிய புத்தகம் – Conclave (2016) – ஒன்று கண்ணில் பட்டதும் படிக்க ஆரம்பித்தேன். சாதாரண வணிக நாவல்தான். விறுவிறுவென்று போவதும், சில நுண்விவரங்களும்தான் புத்தகத்தின் பலம்.

போப் இறந்த பிறகு அடுத்த போப்பை உயர்நிலையில் இருக்கும் சர்ச் குருமார்கள் (cardinals) தேர்ந்தெடுப்பார்கள். தேர்தலை நடத்தும் பொறுப்பு அதிகாரியான லோமலியின் கண்ணோட்டத்தில் மூன்று நாள் நடக்கும் அந்த தேர்தல் விவரிக்கப்படுகிறது. முன்னணியில் இருப்பவர்கள் மீது பாலியல் குற்றச்சாட்டு, ஊழல் குற்றச்சாட்டு வெளிவருகின்றன. கடைசியில் புதிதாக மற்றும் ரகசியமாக நியமிக்கப்பட்ட ஒரு cardinal – பெனிடஸ் – போப்பாகத் தேர்ந்தெடுக்கப்படுகிறார். கடைசி பக்கங்களில் லோமலிக்கு பெனிடஸ் ஒரு திருநங்கை என்று தெரிகிறது. ஆனாலும் பெனிடஸ் போப்பாகிறார்.

மாதொருபாகன் சர்ச்சை (மற்றும் பல சர்ச்சைகள்) பெரிதாக இருந்தபோது பெருமாள் முருகன் ஹிந்து மதத்தை கேவலப்படுத்திவிட்டார் என்று பலரும் ஆத்திரம் அடைந்தனர். அப்போது அடிக்கடி பார்த்த ஒரு கேள்வி – இப்படி பிற மதங்களைப் பற்றி எழுதிவிட முடியுமா? இதோ ஒருவர் எழுதி இருக்கிறார், அது பெஸ்ட்செல்லரும் கூட. யாராவது ஏதாவது கேட்கிறார்களா என்ன? டாவின்சி கோட் இந்தியாவில்தான் தடை செய்யப்பட்டது, கிறிஸ்துவம் dominate செய்யும் மேலை நாடுகளில் அல்ல. ஹாரிஸ் இங்கிலாந்துக்காரர், இங்கிலாந்தின் அரசர்/அரசி இங்கிலாந்து சர்ச்சின் ஏறக்குறைய தலைவர் பதவியில் இருப்பவர். அப்படியும் ஒரு பிரச்சினையும் கிடையாது. என் மகாபாரதச் சிறுகதைகளில் கிருபருக்கு துரோணர் மேல் பொறாமை, பீஷ்மருக்கு அம்பை மேல் காதல் என்றெல்லாம் கற்பனைக் கதைகளாக எழுதித் தள்ளுகிறேன், அதை ஹிந்துத்துவ தளமான தமிழ் ஹிந்து தளத்தில் பிரசுரிக்கவும் செய்கிறார்கள். அது ஏன் திடீரென்று ஒரு புனைவை புனைவாக மட்டும் கருதாமல் அதை தங்கள் மத நம்பிக்கைகளோடு இணைத்துக் கொள்கிறீர்கள்? அதுவும் பன்மைத் தன்மையையும் சகிப்புத்தன்மையையும் தன் அடையாளமாகக் கொண்டுள்ள ஹிந்துக்கள் ஏன் இப்படி செய்கிறீர்கள்? இதற்கு பதிலாக டாவின்சி கோடும் சாதானிக் வெர்ஸசும் தடை செய்யப்படக் கூடாது என்று குரல் எழுப்பலாமே?

தொகுக்கப்பட்ட பக்கம்: த்ரில்லர்கள்

பின்குறிப்பு: ஹாரிசின் எல்லா நாவல்களும் ஒரே தரத்தில் இருப்பதில்லை. உதாரணமாக Fear Index (2010) எல்லாம் பஸ்ஸில் படிக்கக் கூட லாயக்கில்லை. ஆனால் சிசரோ புத்தகங்களோ மிகச் சிறப்பானவை. இது சுமாரான வணிக நாவலாக இருக்கிறது…